Photo: bnews.kz

اقپارات جانە كوممۋنيكاتسيا ءمينيسترى داۋرەن اباەۆ رەسەي تەلەارنالارىنىڭ قازاقستان اۋماعىندا كورسەتىلۋى جايىندا پىكىر ءبىلدىردى.

سەناتتا اقپارات جانە كوممۋنيكاتسيالىق ماسەلەلەر بويىنشا، كەيبىر زاڭنامالىق اكتىلەرگە وزگەرتۋلەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋ بارىسىندا داريعا نازارباەۆا داۋرەن اباەۆقا رەسەيلىك تەلەارنالاردىڭ قازاقستان اۋماعىندا حابار تاراتۋىنا قاتىستى جاعدايدى ءتۇسىندىرۋدى سۇراعان.  ءوز كەزەگىندە داۋرەن اباەۆ: «ءبىز رەسەيلىك ارىپتەستەرىمىزبەن قاڭتار-اقپان ايلارىندا كەلىسسوزدەر جۇرگىزەمىز دەپ كەلىستىك. وعان دەيىن رەسەيلىك تەلەارنالار وشىرىلمەيدى. بۇل جەردە ماسەلە ەكونوميكالىق تۇرعىدان عانا. كەيبىر رەسەيلىك تەلەارنالار ءوز ونىمدەرىن قازاقستان اۋماعىندا كورسەتۋگە بايلانىستى تاريفتەرىن كوتەردى. مىسالى: ەلىمىزدە ۇلكەن سۇرانىسقا يە ەمەس «روسسيا-كۋلتۋرا» ارناسى ءتاريفىن قىمباتتاتتى. ءبىزدىڭ كابەلدىك وپەراتورلارىمىز ولاردىڭ قىزمەتىنەن باس تارتۋعا قۇقىلى» - دەگەن.

ەستەرىڭىزگە سالايىق، بۇعان دەيىن قازاقستان اۋماعىندا كابەل جەلىسىندە حابار تاراتاتىن ID TV وپەراتورى 2017 جىلدىڭ 11 جەلتوقسانىنان باستاپ رەسەيلىك "نتۆ-مير", "رتر-پلانەتا", "روسسيا-24", "روسسيا-كۋلتۋرا" تەلەارنالارىن قازاقستان اۋماعىندا كورسەتۋىن توقتاتاتىندىعىن ايتقان بولاتىن. كەيىننەن سىرتقى ىستەر مينيسترلىگى رەسەي بايلانىس جانە بۇقارالىق اقپارات قۇرالدارى مينيسترلىگىمەن اتالمىش جاعدايعا بايلانىستى كەلىسىمگە كەلگەندىگى جايىندا مالىمدەگەن. وندا رەسەيلىك "نتۆ-مير", "رتر-پلانەتا", "روسسيا-24", "روسسيا-كۋلتۋرا" تەلەارنالارىنىڭ ونىمدەرىن قازاقستاندىق وپەراتورلار 2018 جىلدىڭ 1 ناۋرىزىنا دەيىن بۇرىنعى باعا بويىنشا ساتىپ الاتىندىعى جايىندا ايتىلعان.

“The Qazaq Times”