بۇۇ اقش-تا ءاربىر سەگىزىنشى امەريكالىق كەدەيلىكتە ءومىر ءسۇرىپ جاتقانىن مالىمدەدى

اقش-تا 40 ملن ادام نەمەسە ءاربىر سەگىزىنشى امەريكالىق كەدەيلىكتە ءومىر ءسۇرىپ جاتىر جانە بۇل كورسەتكىش پرەزيدەنت دونالد ترامپ جۇرگىزىپ وتىرعان ساياساتقا بايلانىستى ءوسۋى مۇمكىن. مۇنداي مالىمدەمەنى بۇۇ-نىڭ ارنايى مالىمدەمەشىسى فيليپ ولستون ايتقان.

"قازىرگى كەزدە امەريكالىق ارمان بىرتىندەپ يلليۋزياعا اينالىپ بارادى. ويتكەنى الەمنىڭ باسقا باي ەلدەرىمەن سالىستىرعاندا اقش تۇرعىندارىنىڭ الەۋمەتتىك ستاتۋسىن كوتەرۋ مۇمكىندىگى مۇلدە ازايىپ بارادى", - دەپ مالىمدەگەن ولستون اقش-قا جاساعان ەكى اپتالىق ساپارىنان كەيىن.

بىراق بۇۇ ساراپشىسىنىڭ سوزىنشە، امەريكا وسىعان قاراماستان ەڭ باي، قۋاتتى، تەحنولوگيا-يننوۆاتسيالىق ەلدەردىڭ قاتارىندا قالا بەرەدى. سەبەبى ولاردىڭ تەحنولوگياسى، بايلىعى، كۇش-قۋاتى كەدەيلىكتە ءومىر ءسۇرىپ وتىرعان 40 ملن ادامعا كومەكتەسە المايدى.

سونداي-اق، ول اقش-تىڭ پەزيدەنتى جۇرگىزىپ وتىرعان قازىرگى ساياساتقا بايلانىستى ەلدەگى كەدەيلىك دەڭگەيى ارتا ءتۇسۋى مۇمكىن ەكەنىن ايتادى. ساراپشىنىڭ پىكىرىنشە، ترامپ اكىمشىلىگىنىڭ سالىققا قاتىستى جۇرگىزىپ وتىرعان ساياساتى سالدارىنان امەريكاداعى كەدەي حالىقتىڭ 20%-ىنىڭ جاعدايى ودان سايىن قيىنداي ءتۇسۋى مۇمكىن.

بۇۇ دامۋ باعدارلاماسى ۇسىنعان مالىمەتتەرگە سەنسەك، قازىرگى كەزدە الەم حالقىنىڭ 10%-ى كۇنىنە 2 دوللاردان ارتىق قارجى جۇمساي المايدى ەكەن.

ايتا كەتەيىك، كەدەيلىك دەڭگەيى قازاقستاندا دا قۋانتارلىق كورسەتكىشكە يە ەمەس. 2016 جىلى ءجىو ءوسىمى باسەڭدەۋى جانە ناقتى جالاقىنىڭ ازايۋىنان قازاقستاننىڭ كەدەيلىك دەڭگەيى 19,8 پايىزعا دەيىن ۇلعايعان بولاتىن. ال 2015 جىلى بۇل كورسەتكىش 19,5, 2014 جىلى 16,1 پايىز بولعان.

“The Qazaq Times”