رەسەي پرەزيدەنتى ۆلاديمير پۋتين «ۋكراينا مەن رەسەيدىڭ اراسىنا وت سالدى» - دەپ مالىمدەدى.

جەلتوقسان ايىنىڭ 14-ءى كۇنى رەسەي باسشىسى ۆلاديمير پۋتين ءباسپاسوز ءماسليحاتىن وتكىزدى. ول وندا ۋكراينا ءجۋرناليسىنىڭ «ءسىز ءوزىڭىزدىڭ ءۇشىنشى پرەزيدەنتتىك مەرزىمىڭىزدى اياقتاپ جاتىرسىز. الدا كەلە جاتقان سايلاۋدا حالىق سىزگە داۋىس بەرمەي قويۋى دا مۇمكىن. وسىعان بايلانىستى ءسىز دونباسستا تۇتقىنعا تۇسكەن رەسەيلىكتەردى قايتارىپ العىڭىز كەلمەي مە؟ ەگەر پرەزيدەنت سايلاۋىندا جەڭىسكە جەتسەڭىز الداعى ۋاقىتتا دا دونباسسقا بايلانىستى ابسۋرتتى ساياسات ۇستانۋىڭىزدى جالعاستىرا بەرەسىز بە؟» دەگەن سۇراعىنا: «دونباسستا بولىپ جاتقان جاعدايدىڭ تراگەديا ەكەندىگى ءسوزسىز. مەن ونىمەن تولىقتاي كەلىسەمىن. بىراق قاي ۋاقىتتا بولماسىن كەز كەلگەن تراگەديانىڭ نەدەن شىققانىنا قاراۋ كەرەك. بۇل تراگەديانىڭ باستاۋى قارۋلى، كونستيتۋتسياعا قارسى، مەملەكەتتىك توڭكەرىس. بۇعان ۋكراينا حالقىنىڭ جارتىسى قارسى شىقتى جانە كۇرەستى. ال ول قارسى شىققانداردى ەل بيلىگى دەموكراتيالىق جولمەن ەمەس ارنايى قىزمەتتەر ارقىلى، اسكەري كۇش كورسەتۋ ارقىلى باسىپ، جانشۋعا تىرىستى. دونباسس اۋماعىندا رەسەي اسكەرى جوق. بىراق دونباسسقا قارسى جۇرگىزىلەتىن كەز كەلگەن شابۋىلدى تويتارا الاتىن ارميا قۇرىلدى. كوپتەگەن ادامدار ۋكراينا ءوز بەتىمەن دامۋى كەرەك دەپ ەسەپتەيدى. ول دۇرىستا شىعار. وعان قارسى شىعۋدىڭ قاجەتى جوق. بىراق قازىرگى تاڭدا الەم باسقا باعىتتا دامۋدا. ءبىزدى، رەسەي مەن ۋكراينانى ەكىگە ءبولىپ الدى. سوسىن ارامىزعا وت سالدى» - دەپ جاۋاپ بەرگەن.

“The Qazaq Times”