قازاقستان مەن وزبەكستان شەكارالىق وتكىزۋ بەكەتتەرىن جوندەۋ جۇمىستارىنا بايلانىستى «جول كارتاسىن» ىسكە اسىرۋعا كىرىستى – دەپ حابارلايدى وزبەكستان كەدەن كوميتەتىنىڭ ءباسپاسوز قىزمەتى.

وزبەكستان تاراپى قازاقستانمەن اراداعى ساۋدا بايلانىسىن دامىتۋ ءۇشىن «تاشكەنت»، «گيشت كۋپريك» جانە «زانگيوتا» وتكىزۋ بەكەتتەرىنە كۇردەلى جوندەۋ جۇمىستارىن وتكىزىپ، حالىقارالىق تالاپتارعا ساي جۇك تەكسەرەتىن رەنگەن قۇرىلعىلارىن ورناتپاق. اتالمىش جۇمىستاردىڭ بارلىعى 2018-2019 جىلدار ارالىعىندا جۇزەگە اسىرىلادى دەپ كۇتىلۋدە. ەكى ەل اراسىنداعى كەدەن قىزمەتىن دامىتۋعا بايلانىستى «جول كارتاسى» قۇجاتتارىنا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ وزبەكستانعا رەسمي ءىس-ساپارمەن بارعاندا قول قويعان.

وزبەكستان كەدەن كوميتەتىنىڭ ويىنشا، قازاقستان مەن وزبەكستاننىڭ شەكارالىق وتكىزۋ بەكەتتەرىنىڭ كۇردەلى جوندەۋدەن ءوتۋى ادامدار مەن تاۋارلاردىڭ شەكارادا كەزەكتە تۇرۋىن ازايتادى جانە ەكى ەل اراسىنداعى ساۋدا اينالىمىن بىرنەشە ەسەگە ارتتىرۋعا مۇمكىندىك بەرەدى.

“The Qazaq Times”