فوتو: Atameken Business Channel

2017 جىلعى 29 قاراشادا قازاقستان رەسپۋبليكاسى ۇلتتىق بانكىنىڭ باسقارماسى قازاقستان رەسپۋبليكاسىنىڭ 2018 جىلعا ارنالعان اقشا-كرەديت ساياساتىنىڭ نەگىزگى باعىتتارىن ماقۇلدادى، دەپ حابارلايدى باس بانكتىڭ ءباسپاسوز قىزمەتى.

قارجى ينستيتۋتىنىڭ مالىمەتىنشە، قۇجاتتا اقشا-كرەديت ساياساتىنىڭ 2017 جىلعى شارالارى، سونداي-اق 2018 جىلعا ارنالعان نىسانالى باعدارلار، ساياساتتىڭ قاعيداتتارى مەن باعىتتارى قامتىلعان. اقشا-كرەديت ساياساتىنىڭ شارالارى ينفلياتسيا بويىنشا 4%-دان تومەن ورتا مەرزىمدى ماقساتقا قول جەتكىزۋگە باعىتتالاتىن بولادى.

"اقشا-كرەديت ساياساتىنىڭ نەگىزگى باعىتتارىندا 2020 جىلعا جانە ودان كەيىنگى
جىلدارى ينفلياتسيا بويىنشا ورتا مەرزىمدى ماقسات تومەن، بىراق 4%-عا جۋىق دەپ ايقىندالعان. سونىمەن بىرگە ينفلياتسيا بويىنشا كەلەسى 2 جىلعا ارنالعان ارالىق نىسانالى ولشەمدەر كورسەتىلگەن: 2018 جىلدىڭ سوڭىندا – 5-7%، 2019 جىلدىڭ سوڭىندا – 4-6%. ۇلتتىق بانك اقشا-كرەديت ساياساتىن ينفلياتسيالىق تارگەتتەۋ جانە تەڭگەنىڭ ەركىن وزگەرمەلى ايىرباستاۋ باعامى ساياساتى رەجيمىندە ىسكە اسىرۋدى جالعاستىراتىن بولادى", - دەلىنگەن حابارلامادا.

بۇدان بولەك باس بانك ينفلياتسيالىق تارگەتتەۋ رەجيمى ينفلياتسيانى ءتيىمدى تۇردە تومەندەتۋگە جانە ونى باعا تۇراقتىلىعىن بىلدىرەتىن دەڭگەيدە ۇستاپ تۇرۋعا مۇمكىندىك بەرەتىنىن، بۇل ۇزاق مەرزىمدى پەرسپەكتيۆادا ەكونوميكانىڭ وسۋىنە وڭ ىقپال ەتەتىنىن ايتادى.

"ينفلياتسيا بويىنشا ماقساتتارعا جەتۋ ءۇشىن ۇلتتىق بانك ينفلياتسيانىڭ بولجاناتىن دەڭگەيىنە جانە باسقا ولشەمدەرگە قاتىستى بازالىق پايىزدىق مولشەرلەمە بەلگىلەيدى. ناقتى كورسەتىلگەن بازالىق مولشەرلەمە، ياعني ينفلياتسيانىڭ 12 ايعا ارنالعان بولجاناتىن ءمانىن شەگەرگەندەگى نومينالدىق مولشەرلەمە 4%-دان جوعارى بولمايتىن دەڭگەيدە ۇستالىپ تۇرادى", -دەيدى رەتتەۋشى.

سونىمەن قاتار، ۇلتتىق بانك ترانسميسسيالىق تەتىكتىڭ ارنالارىن جەتىلدىرۋ
بويىنشا، كىرىستىلىكتىڭ بارابار قيسىعىن قالىپتاستىرۋ ءۇشىن جاعدايلار جاساۋ بويىنشا، حالىقتىڭ ينفلياتسيا جاعدايىن تۇراقتاندىرۋ بويىنشا جۇمىستى جالعاستىرادى.

“The Qazaq Times”