الماتى قالاسىنداعى م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا «توكيو ساپارىنا» ارنالعان ءباسپاسوز كونفەرەنتسياسى ءوتتى.

كونفەرەنتسيا قر پرەزيدەنتى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىنىڭ «جاھانداعى زاماناۋي قازاقستاندىق مادەنيەت» اتتى حالىقارالىق جوباسى اياسىندا قر مادەنيەت جانە سپورت مينيسترلىگىنىڭ تىكەلەي قولداۋىمەن ءوتىپ وتىر.

ءباسپاسوز كونفەرەنتسياسىنا تەاتر ديرەكتورى، قازاقستاننىڭ ەڭبەك سىڭىرگەن قايراتكەرى ەرلان ءبىلال، تەاتر ديرەكتورىنىڭ كەڭەسشىسى، قازاقستاننىڭ حالىق ءارتىسى، پروفەسسور ەسمۇحان وباەۆ، قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى ءسابيت ورازباەۆ، تەاتردىڭ «ادەبيەت ءبولىمىنىڭ» مەڭگەرۋشىسى، حالىقارالىق «الاش» سىيلىعىنىڭ لاۋرەاتى  ءاليا بوپەجانوۆا، جازۋشى-دراماتۋرگ، «اقتاستاعى احيكو» دراماسىنىڭ اۆتورى مادينا وماروۆا قاتىستى. جيىننىڭ مودەراتورى تەاتردىڭ «ءباسپاسوز قىزمەتى» ءبولىمىنىڭ جەتەكشىسى، حالىقارالىق «الاش» ادەبي سىيلىعىنىڭ لاۋرەاتى باقىت بەدەلحان بولدى.

باسقوسۋدا تەاتر ۇجىمىنىڭ 19-26 جەلتوقسان ارالىعىندا  توكيودا وتەتىن  گاسترولدىك ساپارى جايلى ءسوز قوزعالدى. ءىس-ساپاردىڭ ماقساتى – قازاق  تەاترلارىنىڭ مارتەبەسىن كوتەرىپ، ۇلتتىق قۇندىلىقتارىمىز بەن جادىگەرلەرىمىزدى ۇلىقتاپ، الەمنىڭ ەڭ دامىعان مەملەكەتتەرىندە تانىتۋ.

اكەمتەاتر ۇجىمى «توكيو ساپارىندا» رەپەرتۋارداعى م.وماروۆانىڭ «اقتاستاعى احيكو» دراماسىن (رەج.ا.ماەميروۆ) جانە «ۇلى دالا ەلى» اتتى ۇلت رۋحانياتىن ۇلىقتايتىن كونتسەرتتىك باعدارلامانى جاپوندىقتاردىڭ نازارىنا ۇسىنادى. سونىمەن بىرگە، تەاتر مۋزەيىنەن ورىن العان قۇندى جادىگەرلەرىمىز بەن ۇلتتىق قۇندىلىقتارىمىزدى تانىتاتىن كورمە دە ۇيىمداستىرىلادى.

“The Qazaq Times”