اقش ەڭ جوعارى سوتى. فوتو: WSJ.

قۇراما شتاتتىڭ ەڭ جوعارى سوتى دۇيسەنبى كۇنى شەشىم شىعارىپ، ترامپ ۇكىمەتى جولعا قويعان كەيبىر ەلدەردىڭ ازاماتتارىن اقش-قا كىرۋىنە شەكتەۋ جونىندەگى قارارىن ماقۇلدادى. وسىعان دەيىن اقش-تاعى بىرقاتار تومەنگى سوتتار كەدەرگى بولىپ كەلگەن قارارعا، جوعارى سوت شەشىمى اق ۇيگە ۇلكەن قولداۋ بەرىپ وتىر. جوعارى سوت ۇكىمەتكە تيىم سالۋعا رۇقسات بەرۋ تۋرالى قىسقا جازباشا ۇيعارىمىن شىعاردى. بۇل تۋرالى “WSJ” باسىلىمى حابارلادى.

قۇراما شتات پرەزيدەنتى دونالد ترامپ 24 قىركۇيەك كۇنى جاريالاعان مالىمەتىندە، ۇلتتىق قاۋىپسىزدىكتى قامتاماسىز ەتۋ ماقساتىندا، سەگىز ەلدىڭ ازاماتتارىنا اقش-قا ساياحاتتاپ كىرۋىنە شەكتەۋ قويعان. ولار: چاد، يران، ليۆيا، سومالي، سيريا جانە يەمەن سياقتى 6 مۇسىلمان ەلمەن قاتار، سولتۇستىك كورەيا ازاماتتارى جانە ۆەنەسۋەلانىڭ كەيبىر ۇكىمەت وكىلدەرىنە قاراتىلعان. بۇل ترامپتىڭ ءۇشىنشى رەت جاريالاعان شەكتەۋ ساياساتى.

جوعارعى سوتتىڭ قاۋلىسى بويىنشا، ترامپ ۇكىمەتى شەكتەۋ ساياساتى نەگىزىندە جوعارى سوتقا ۇلتتىق قاۋىپسىزدىك تالاپتارىن قاناعاتتاندىرۋدىڭ ناقتى جولدارىن جولداۋى كەرەك. جوعارى سوت تارابى ونى قايتا قاراپ، الداعى ۋاقىتتا تولىق بەكىتىلگەن قاراردى جاريا ەتەدى.

“The Qazaq Times”