فوتو: Pikabu

الماتى قالاسىنداعى فۋرمانوۆ كوشەسىنە نۇرسۇلتان نازارباەۆتىڭ اتى بەرىلەتىن بولدى.

قاراشا ايىنىڭ 30-ى كۇنى الماتى قالالىق ءماسليحات وتىرىسىندا قالالىق ونوماستيكالىق كوميسسيا مەن رەسپۋبليكالىق ونوماستيكالىق كوميسسيا كەلىسىمى بويىنشا، ەل ۇكىمەتى الماتى قالاسىنىڭ باستى كوشەلەرىنىڭ بىرىنە نۇرسۇلتان نازارباەۆتىڭ اتىن بەرۋگە شەشىم شىعارعان.

وسىعان بايلانىستى الماتى قالاسىنىڭ اكىمى باۋىرجان بايبەك ءماسليحات وترىسىندا سويلەگەن سوزىندە: «قالالىق ونوماستيكالىق كوميسسياعا شاھاردا بىرنەشە رەت قايتالانعان 112 كوشەنىڭ اتىن وزگەرتۋ تۋرالى ۇسىنىس جاسالدى. اتالمىش كوشەلەردىڭ اتى وزگەرەتىن بولعاننان كەيىن، قالا تۇرعىندارى، زيالى قاۋىم وكىلدەرى، جەكە تۇلعالار، جاستار، قالانىڭ باستى كوشەلەرىنىڭ ءبىرى  فۋرمانوۆ كوشەسىنە ەلباسىمىز نۇرسۇلتان ءابىشۇلى نازارباەۆتىڭ اتىمەن اتاۋدى سۇراپ ءوتىنىش جاسادى» - دەگەن.

بىراق بۇل الماتى قالاسى حالقى ءۇشىن اسا ۇلكەن جاڭالىق ەمەس. ويتكەنى شاھار تۇرعىندارى اراسىندا وسىندا بىرنەشە جىل بۇرىن فۋرمانوۆ كوشەسىنە نازارباەۆتىڭ اتىن بەرەدى ەكەن دەگەن الىپقاشپا اڭگىمە تاراعان بولاتىن.

“The Qazaq Times”