فوتو: prokuror.gov.kz

قازاقستاننىڭ باس پروكۋراتۋراسى قاتارداعى قىزمەتكەرلەردىڭ جاڭارتىلىپ جاتقانى تۋرالى مالىمدەدى.

باقىلاۋشى ورگاننىڭ مالىمەتىنشە، 2017 جىلدىڭ ماۋسىمىندا باس پروكراتۋرانىڭ ىشكى قاۋىپسىزدىك باسقارماسى دەپارتامەنت بولىپ قايتا قۇرىلعان. شتات 6 ادامنان 13-كە دەيىن كوبەيتىلىپ، دەپارتامەنتكە تەرگەۋ بويىنشا جۇمىس تاجىريبەسى بار قىزمەتكەرلەر قابىلدانۋدا. سونداي-اق، قىلمىستىق ىستەردى تەرگەۋشى ارنايى پروكۋرورلار توبى قۇرىلعان.

بۇدان بولەك، 12 پروكۋرور ءتۇرلى كەلەڭسىز جاعدايلار بويىنشا قىزمەتىنەن بوساتىلعان.

"بيىل دەپارتامەنت 191 تەكسەرۋ ءىس-شارالارىن وتكىزدى. 93 پروكۋرور ءارتۇرلى جاۋاپقا تارتىلدى. ولاردىڭ 12-ءسى كەلەڭسىز سەبەپتەر بويىنشا جۇمىستان بوساتىلسا، التاۋىنىڭ لاۋازىمى شەكتەلگەن.  قالعانى ءتۇرلى دەڭگەيدەگى تارتىپتىك جاۋاپكەرشىلىككە تارتىلدى. قىزمەتكەرلەردىڭ كوپشىلىگى، ياعني 40 پروكۋرور ار-نامىس كودەكسىن بۇزعان", - دەپ حابارلادى ۆەدومستۆودان.

بۇدان بولەك، ون قىزمەتكەرگە قاتىستى قىلمىستىق ءىس تىركەلگەن. ولاردىڭ جەتەۋى باسشىلىق قىزمەتتە بولعان. سونداي-اق، پروكۋراتۋرادا تالاپتار كۇشەيتىلگەندىكتەن قىزمەتكەرلەرىنىڭ كوبى ءوز ەرىكتەرىمەن قىزمەتتەن كەتكەن.

ايتا كەتەيىك، سوڭعى ۋاقىتتا قازاقستاننىڭ قۇقىق قورعاۋ ورگاندارىنداعى زاڭ بۇزۋ اكتىلەرى جيىلەي تۇسكەنىن وسى مالىمەتتەردەن-اق بايقاۋعا بولادى. ياعني قاتاڭ ءتارتىپ ورناتىپ، جۇگەنسىزدەردى جونگە كەلتىرەتىن مۇنداي ورىنداردىڭ وزىندە ولقىلىقتار بولسا، ەلدەگى تارتىپسىزدىككە ەشكىم شەكتەۋ قويا المايتىنى بەلگىلى.

“The Qazaq Times”