رەسەيدە يسلام كارىموۆكە ەسكەرتكىش ورناتۋعا قارسى اكتسيا وتۋدە

رەسەيدە وزبەكستان باسشىسى يسلام كارىموۆكە ماسكەۋ قالاسىندا ەسكەرتكىش ورناتۋعا قارسى اكتسيا وتۋدە.

قارسىلىق اكتسياسىن ۇيىمداستىرۋشىلاردىڭ ءبىرى لدپر پارتياسىنىڭ مۇشەسى گەورگي گورودەتسكي. ونىڭ سوزىنشە، ماسكەۋ قالاسىندا "ورىس حالقىنىڭ جاۋى جانە ديكتاتور" يسلام كارىموۆكە ەسكەرتكىش ورناتۋعا بولمايدى. جانە دە رەسەي بيلىگىنە وزبەكستانمەن اراعا ۆيزا ەنگىزۋ قاجەت. ايتپەسە رەسەيگە جىل سايىن ورىس ءتىلىن بىلمەيتىن، تۇسىنبەيتىن، جازا المايتىن مىڭداعان وزبەك جۇمىس ىستەۋگە كەلۋدە. گورودەتسكي ءوز ويىن جۇزەگە اسىرۋ ءۇشىن "Change.org" سايتىندا اتالمىش باستامانى قولدايتىن ادامداردىڭ قولىن جيناۋ جۇمىستارىن باستاپ كەتكەن. قازىرگى تاڭدا 6 مىڭنان استام ادام گورودەتسكي كوزقاراسىمەن كەلىسەتىنىن ايتىپ داۋىس بەرگەن.

ەستەرىڭىزگە سالايىق، 2016 جىلىڭ 1 قاراشا كۇنى ماسكەۋ قالاسىنىڭ مەرى سەرگەي سوبيانين وزبەكستان ەلشىلىگى ورنالاسقان ياكيمانكا اۋدانىندا يسلام كارىموۆ ەسكەرتكىشىن 2019 جىلدىڭ 31 جەلتوقسانىنا دەيىن ورناتۋ كەرەكتىگىن ايتقان بولاتىن. ەسكەرتكىش قۇنى 35 ميلليون ءرۋبلدى قۇرايدى. اتالمىش قارجىنى تولىعىمەن وزبەكستان بيلىگى ءوز مويىنانا العان. ال قۇرىلىس جۇمىستارىن رەسەي تاراپى جۇرگىزەتىن بولعان.

جالپى رەسەيدە 2 ميلليوننان استام وزبەك ۇلتى تۇرادى. رف كوشى-قون قىزمەتى تاراتقان سوڭعى مالىمەتتەر بويىنشا، قازىرگى تاڭدا رەسەي اۋماعىندا 1 ميلليون 700 مىڭنان استام ەڭبەك ميگرانتتارى بار. ولاردىڭ 200 مىڭنان استامى وزبەكستان ازاماتتارى.

“The Qazaq Times”