قىرعىزستان بيلىگى قازاقستاندىق «Kazakhmys» كورپوراتسياسىنا تيەسىلى وسوو «قاز مينەرالز بوزىمچاك» كومپانياسىنىڭ ليتسەنزياسىن ءۇش ايعا توقتاتتى.

قىرعىزستان مەملەكەتتىك ەنەرگەتيكا جانە جەر قويناۋىن پايدالانۋ كوميتەتىنىڭ باسشىسى ۇلان رىسقۇلوۆتىڭ سوزىنشە، وسوو «قاز مينەرالز بوزمىچاك» كومپانياسى جۇمىسىندا ەكونوميكالىق جانە تەحنيكالىق زاڭ بۇزۋشىلىقتار انىقتالعاننان كەيىن ءۇش ايعا توقتاتىلعان. رىسقۇلوۆ وسى ماسەلە بويىنشا «Tazabek» اقپارات اگەنتتىگىنە بەرگەن سۇحباتىندا: «بۇعان دەيىن مەملەكەتتىك ەكونوميكا جانە تەحنيكالىق تەكسەرۋلەر باسقارماسى وسوو «قاز مينەرالز بوزىمچاك» جۇمىسىن تەكسەرگەن بولاتىن. تەكسەرۋ بارىسىندا بىرنەشە زاڭ بۇزۋلار انىقتالدى. وسىعان بايلانىستى ءبىز اتالمىش ولقىلىقتاردىڭ ورنىن تولتىرۋعا كومپانياعا ءۇش اي ۋاقىت بەردىك. وسى ءۇش اي ىشىندە كومپانيا ليتسەنزياسى ۋاقىتشا توقتاتىلاتىن بولادى» - دەگەن.

ەستەرىڭىزگە سالايىق، وسوو «قاز مينەرالز بوزىمچاك» «كيتكو. بي. ۆي» كومپانياسىنا تيەسىلى. ال بۇل كومپانيا ءوز كەزەگىندە قازاقستاندىق «قازاقمىستىڭ» ەنشىلەس كومپانياسى. بۇدان بولەك ۆلاديمير كيمنىڭ «Kazakhmys» كورپوراتسياسى قىرعىزستاندا «Kazakhmys Gold Kyrgyzstan» كومپانياسىنا يە.

“The Qazaq Times”