فوتو: نتۆ

قازاقستانداعى مۇناي وڭدەۋ زاۋىتتارىنىڭ اۋە كومپانيالاردىڭ  كەروسين قاجەتتىگىن تولىق قامتاماسىز ەتە الماۋى جانە رەسەيدىڭ اۋە كەمەلەرىنە ارنالعان وتىندى ەكسپورتتاۋعا تىيىم سالۋى "ەير استانا" اۋە كومپانياسىن الاڭداتىپ وتىر. بۇل تۋرالى بۇگىن كومپانيا پرەزيدەنتى پيتەر فوستەر الماتىدا وتكەن ءباسپاسوز كونفەرەنتسياسىندا مالىمدەدى.

"اۋە كەروسينىنە قاتىستى جاعداي قيىن. سىزدەر ءتۇسىنۋ ءۇشىن ايتايىن،  قازاقستانداعى اۋە كومپانيالارعا ايىنا 17,5 مىڭنان 21 مىڭ تونناعا دەيىن كەروسين قاجەت. قازاقستانداعى ءۇش مۇناي وڭدەۋ زاۋىتى اۆياتسيا نارىعىنداعى سۇرانىستىڭ ۇشتەن ەكى بولىگىن عانا قامتاماسىز ەتەدى. ال ۇشتەن ءبىر بولىگىن شەتەلدەن ساتىپ الۋعا تۋرا كەلەدى", - دەدى فوستەر.

ونىڭ سوزىنشە، بىرنەشە اي بۇرىن رەسەي ىشكى نارىقتاعى سۇرانىستىڭ ارتۋىنا بايلانىستى وزدەرىنىڭ تس-1 كەروسينىن ەكسپورتتاۋدى شەكتەيتىنىن مالىمدەگەن جانە بۇل اۋە وتىنىنا قاتىستى جاعدايدى ۋشىقتىرىپ جىبەرگەن. بۇدان بولەك اۋە كومپانيانىڭ باسشىسى اتاپ وتكەندەي،"قازاقستاندا بىردە ءبىر ءموز ءوزىنىڭ ءوندىرىس قۋاتىن  ونداعان جىلداردان بەرى ارتتىرماعاندىقتان، كەروسين تاپشىلىعى تاريحي پروبلەما" بولىپ وتىر.

ال وسى ماسەلەلەردى شەشۋ ماقساتىندا "ەير استانا" كوپتەگەن ەلدەردەن ساتىپ الۋعا بولاتىن  JA-1 كەروسينىنە ءوتۋ تۋرالى ۇزاق مەرزىمدى شەشىم قابىلداعان.

“The Qazaq Times”