فوتو: كومسومولسكايا پراۆدا

قازاقستان قىرعىزستانعا ۇسىنعان 100 ميلليون دوللار كومەگىن قانداي دا ءبىر تەمىر-تەرسەك كۇيىندە بەرەر ەدى - دەدى قىرعىز پرەمەر-ءمينيسترى ساپار يساكوۆ.

بىشكەك قالاسىندا قازان ايىنىڭ 30-ى كۇنى وتكەن ۇكىمەت وتىرىسىندا ساپار يساكوۆ جۋرناليستەر مەن مينيسترلەر الدىندا ەل بيلىگى قازاقستان ۇسىنعان 100 ميلليون دوللار كومەكتەن نە ءۇشىن باس تارتقاندىعىن ءتۇسىندىردى. ول وندا: «قازاقستان شەكاراسىن ەشقانداي ەسكەرتۋسىز كۇشەيتىلگەن رەجيمگە كوشىردى. بۇل قىرعىزستاننىڭ ماكروەكونوميكالىق كورسەتكىشتەرىنە اسەر ەتىپ، سىرتقى ساۋدا-ساتتىق جۇمىستارىن باياۋلاتادى. ءبىز قازاقستان ۇسىنعان 100 ميلليون دوللار قارجىنى ۇزاق كۇتسەك تە ودان باس تارتتىق. سەبەبى قازاقستان ونى بىزگە ءبارىبىر تەحنيكالىق كومەك رەتىندە قانداي دا ءبىر تەمىر-تەرسەك كۇيىندە بەرەر ەدى» - دەگەن.

ەستەرىڭىزگە سالايىق، قىرعىزستان جوعارى كەڭەسى قازان ايىنىڭ 25-ءسى كۇنى قازاقستان ۇسىنعان 100 ميلليون دوللار كومەكتەن باس تارتۋعا بايلانىستى زاڭ جوباسىن ماقۇلداعان بولاتىن. قىرعىز بيلىگىنىڭ بۇل شەشىمى قوعامدا قىزۋ تالقىلانىپ، جۇرتشىلىق بۇنى بىرنەشە ايدان بەرى اتامباەۆ پەن نازارباەۆ اراسىنداعى تەكەتىرەستىڭ سالدارىنان بولعان جاعداي دەپ باعامداعان.

“The Qazaq Times”