كاتالونيانىڭ بۇرىنعى باسشىسى كارلەس پۋدجەمون.

يسپانيانىڭ سىرتقى ىستەر ءمينيسترى الفونسو داستيس مالىمدەمە جاساپ، قىزمەتتەن بوساتىلعان كاتالونيانىڭ بۇرىنعى ليدەرى جەلتوقسان ايىنداعى سايلاۋعا قاتىسا الاتىنىن ايتتى. الايدا، ول تەك قاماۋعا الىنباعان جاعدايدا عانا قاتىسا الاتىنىن دا ەسكەرتتى. بۇل تۋرالى BBC-ءدىڭ رەسمي سايتى جازدى.

الفونسو بۇل مالىمدەمەسىن بارسەلوناداعى يسپانيا بىرلىگىن قولداپ، شەرۋگە شىققاندار الدىندا تۇرىپ جاسادى. كاتالونيا بىرجاقتى تاۋەلسىزدىك جاريالاعاننان كەيىن يسپانيا بيلىگى بۇل ايماقتىڭ اۆتونوميالىق ستاتۋسىنان الىپ تاستادى جانە كاتالونيا ليدەرىن جۇمىستان بوساتتى.

الەم اقپارات كوزدەرىنە قارايتىن بولساق، قازىرگى كەزدە يسپانيا ورتالىق ۇكىمەتى كاتالونيانىڭ بارلىق مەكەمەلەرىن تولىقتاي باسقارۋىندا ۇستاپ تۇر. الداعى ۋاقىتتا يسپانيانىڭ باس پروكۋراتۋراسى كاتالونيانىڭ قىزمەتتەن بوساتىلعان ليدەرى پۋدجەمونتتىڭ جانە وزگە دە باسشىلاردىڭ ۇستىنەن قىلمىستىق ءىس قوزعاۋى مۇمكىن. ولار يسپانيانىڭ كونستيتۋتسياسىن بۇزدى دەپ ايىپتالۋدا.

“The Qazaq Times”