قىرعىزستان ءسىم قازاقستان بيلىگىن سىنعا الدى

قازاقستان تاراپى قازاق-قىرعىز شەكاراسىنداعى جاعدايدى حالىققا  دۇرىس تۇسىندىرمەي وتىر – دەپ مالىمدەدى قىرعىزستان سىرتقى ىستەر مينيسترلىگى ءباسپاسوز قىزمەتى.

بۇگىن ياعني قازان ايىنىڭ 27-ءسى كۇنى قىرعىز تاراپى تاراتقان رەسمي مالىمدەمەدە: «قىرعىزستان جۇرتشىلىعى وسى ۋاقىتقا دەيىن قازاق-قىرعىز جانە قازاقستان-رەسەي شەكاراسىندا بولىپ جاتقان جاعدايلاردى سىرتتاي باقىلاپ وتىر. اتالمىش شەكارالاردا قازان ايىنىڭ باسىنان بەرى كەدەن قىزمەتى كۇشەيتىلگەن رەجيمگە كوشكەن. بىراق بۇنىڭ بارلىعى ەاەو زاڭدارى مەن قازاق-قىرعىز وداعىنا قايشى كەلەتىن ارەكەتتەر. قازاقستان بيلىگى قازاق-قىرعىز شەكاراسىندا بولىپ جاتقان جاعدايلاردى وسى ۋاقىتقا دەيىن ءارتۇرلى ءتۇسىندىرىپ كەلدى. 11 قازان كۇنى قازاقستان رەسپۋبليكاسىنىڭ ۇلتتىق قاۋىپسىزدىك قىزمەتى قازاق شەكاراشىلارىنىڭ كۇشەيتىلگەن رەجيمگە كوشۋىن «قاۋىپسىزدىك شارالارىن كۇشەيتۋ» دەپ تۇسىندىرگەن. ال 14 قازان كۇنى قر اقپارات جانە كوممۋنيكاتسيا ءمينيسترى داۋرەن اباەۆ قازاق-قىرعىز شەكاراسىنداعى جاعدايدى قىرعىزستانداعى پرەزيدەنت سايلاۋىمەن بايلانىستىردى. بىراق كەيىنەن 15 قازان كۇنى قر اقپارات جانە كوممۋنيكاتسيا مينيسترلىگى قازاق-قىرعىز شەكاراسىنداعى جاعداي ەاەو زاڭدارىنا سايكەس جۇرگىزىلىپ جاتقان جۇمىستاردىڭ كورىنىسى دەگەن اقپارات تاراتتى. وسىلايشا قازاقستان بيلىگى قوس ەلدىڭ حالقىنا دۇرىس اقپارات بەرمەي وتىر» - دەلىنگەن.

ەستەرىڭىزگە سالايىق، بۇعان دەيىن قازاقستان پرەمەر-ءمينيسترى باقىتجان ساعىنتاەۆ قىرعىزستان كەدەن قىزمەتىن قاتاڭ سىنعا الىپ، قىرعىز بيلىگى وسى ۋاقىتقا دەيىن ەاەو ەلدەرىنە جالعان اقپارات بەرىپ كەلدى دەگەن بولاتىن.

“The Qazaq Times”