فوتو: Kapital.kz

قر پارلامەنتى ءماجىلىسىنىڭ پلەنارلىق وتىرىسى بارىسىندا ۇكىمەت ازىرلەگەن، 2018–2020 جىلدارعا ارنالعان رەسپۋبليكالىق بيۋدجەت پارامەترلەرى قارالدى، دەپ حابارلايدى پرەمەر-ءمينيستردىڭ رەسمي سايتى.

قارجى مينيسترلىگىنىڭ اقپاراتىنشا، 2018–2020 جىلدارعا ارنالعان رەسپۋبليكالىق بيۋدجەت جوباسى بيىل تامىز ايىندا ماقۇلدانعان رەسپۋبليكانىڭ 2018–2022 جىلعا ارنالعان الەۋمەتتىك-ەكونوميكالىق دامۋ بولجامىنىڭ نەگىزىندە قالىپتاستىرىلعان.

رەسپۋبليكالىق بيۋدجەتتىڭ جوسپارلى كەزەڭگە ارنالعان نەگىزگى پارامەترلەرى 2018 جىلى — 8578,3 ملرد تەڭگە ء(جىو-گە 15,3%), 2019 جىلى — 9190,2 ملرد تەڭگە (15,1%), 2020 جىلى — 9566,2 ملرد تەڭگە (14,6%) تۇسىمدەرىنەن تۇرادى. 2018 جىلى شىعىندار 9217,9 ملرد تەڭگە ء(جىو-گە 16,5%), 2019 جىلى — 9798,2 ملرد تەڭگە (16,1%), 2020 جىلى — 10 219,7 ملرد تەڭگە (15,6%) كولەمىندە جوسپارلانعان.

رەسپۋبليكالىق بيۋدجەت شىعىستارىنىڭ جالپى كولەمىندە ەڭ ۇلكەن ۇلەس الەۋمەتتىك سالاعا تيەسىلى، ول 2018 جىلى 44,6%-دان 2020 جىلى 47,4%-عا دەيىن ارتادى. اقشالاي مانىندە بۇل 13 401 ملرد تەڭگەنى قۇرايدى، سونداي-اق، 2018 جىلى — 4108,6 ملرد تەڭگە.

اتالعان شىعىستار بلوگىنىڭ نەگىزگى كولەمى الەۋمەتتىك قامسىزداندىرۋ مەن ەل ازاماتتارىنا الەۋمەتتىك كومەك كورسەتۋگە ءتان. جوسپارلى كەزەڭدە بۇل باعىتقا 8707,5 ملرد تەڭگە قاراستىرىلعان. ولاردىڭ ىشىندە اعىمداعى جىلى 473 ملرد تەڭگەگە نەمەسە 22,1%-عا وسىممەن 2018 جىلى 2612,9 ملرد تەڭگە قاراستىرىلعان.

سونىمەن قاتار اتالعان شىعىستاردىڭ نەگىزگى ۇلەسىن الەۋمەتتىك تولەمدەر قۇرايدى. ءۇش جىلدىق كەزەڭدە ولاردى قارجىلاندىرۋعا 8508,7 ملرد تەڭگە، ونىڭ ىشىندە 2018 جىلى — 2547,9 ملرد تەڭگە بولىنەدى.

بيىلعى جىلمەن سالىستىرعاندا 2018 جىلى زەينەتاقى تولەمدەرىنىڭ ارتۋى بىرقاتار سەبەپتەر مەن باستامالارعا بايلانىستى. بۇل — الۋشىلار سانىنىڭ ۇلعايۋى، زەينەتاقى مولشەرلەرىن جىل سايىنعى يندەكستەۋ، زەينەتاقى جۇيەسىنە قاتىسۋ وتىلىنە قاراي بازالىق زەينەتاقى تولەمدەرىن تاعايىنداۋ ءتارتىبىنىڭ وزگەرۋى، سونداي-اق، ەڭ تومەنگى كۇنكورىس دەڭگەيى قۇرىلىمىنىڭ وزگەرۋى.

بۇدان وزگە، 2018 جىلدان باستاپ ەڭ تومەنگى كۇنكورىس دەڭگەيىنىڭ 50% دەڭگەيىندە كومەك كورسەتۋ كريتەريىن قوسۋ ارقىلى اتاۋلى الەۋمەتتىك كومەكتىڭ جاڭا فورماتى ەنگىزىلەدى.

2018–2020 جىلدارعا ارنالعان دەنساۋلىق ساقتاۋ جۇيەسىنىڭ شىعىستارى 3342,5 ملرد تەڭگەنى قۇرايدى، ونىڭ ىشىندە 2018 جىلى — 1070,3 ملرد تەڭگە. ولاردىڭ ءوسىمى نەگىزىنەن مىندەتتى الەۋمەتتىك مەديتسينالىق ساقتاندىرۋعا ساپالى كوشۋ ماقساتىندا تەگىن مەديتسينالىق كومەكتىڭ كەپىلدەندىرىلگەن كولەمىن ارتتىرۋعا بايلانىستى.

2018–2020 جىلدارعا ارنالعان بيۋدجەت جوباسىندا ءبىلىم جانە عىلىم جۇيەسىن دامىتۋعا 1123,1 ملرد تەڭگە قاراستىرىلعان، ونىڭ ىشىندە 2018 جىلعا – 340,6 ملرد تەڭگە.

جوسپارلى ءۇش جىلدىق كەزەڭدە ورتا ءبىلىم بەرۋ سالاسىندا جان باسىنا شاققانداعى قارجىلاندىرۋ جۇيەسىن ەنگىزۋ بويىنشا قولدانىستاعى «پيلوتتىق جوبانى» كەڭەيتۋ جوسپاردا بار.

وسىلايشا، 2018 جىلعى قىركۇيەكتەن باستاپ استانا قالاسىنىڭ بارلىق 85 مەكتەبىن كوشىرۋ كوزدەلگەن. 2019 جىلى جوباعا 239 مەكتەبىمەن الماتى قالاسى قوسىلادى. 2020 جىلدان باستاپ ەلىمىزدىڭ بارلىق تولىق جيىنتىقتى مەكتەپتەرىندە جان باسىنا شاققانداعى قارجىلاندىرۋدى جاپپاي ەنگىزۋ جوسپارلانعان.

مادەنيەت پەن سپورتتى دامىتۋعا ارنالعان 2018–2020 جىلداردىڭ شىعىستارى 219,7 ملرد تەڭگەنى قۇرايدى، ونىڭ ىشىندە 2018 جىلى — 82 ملرد تەڭگە.

ەكونوميكانىڭ ناقتى سەكتورىن دامىتۋعا قولداۋ كورسەتۋ بويىنشا شىعىستار بلوگىندا كەلەسى باعىتتار قارجىلاندىرىلادى:

  • «نۇرلى جول»، «نۇرلى جەر»، يندۋستريالدى-يننوۆاتسيالىق دامۋ، وڭىرلەردى 2020 جىلعا دەيىن دامىتۋ باعدارلامالارىن ىسكە اسىرۋعا جانە ءۇش جىلدىق كەزەڭدە كولىك جانە لوگيستيكا ينفراقۇرىلىمىن دامىتۋعا 2064,9 ملرد تەڭگە، سونىڭ ىشىندە 2018 جىلى —  854,8 ملرد تەڭگە بولىنەدى.
  • ەكونوميكانىڭ جاڭا درايۆەرى رەتىندە اگرارلىق سەكتوردى دامىتۋ ءۇشىن اۋىل شارۋاشىلىعى مينيسترلىگىنە ءۇش جىلعى كەزەڭگە 787 ملرد تەڭگە قاراستىرىلعان، سونىڭ ىشىندە 2018 جىلى —  275,4 ملرد تەڭگە.
  • جەدەلدەتىلگەن تەحنولوگيالىق جاڭعىرتۋدى جالعاستىرۋ ماقساتىندا «تسيفرلىق قازاقستان» مەملەكەتتىك باعدارلاماسىنىڭ جوباسى ازىرلەندى. 2018–2020 جىلدارعا ارنالعان بيۋدجەت جوباسىندا قارجىلاندىرۋ كولەمى 17 ملرد تەڭگەنى قۇرايدى.

“The Qazaq Times”