2020 جىلعى قازاقستاننىڭ ەكونوميكاسى السىرەپ، جالپى ىشكى ءونىم ء(جىو) كورسەتكىشى 2,6%-عا كەمىگەن.  

سەيسەنبى تاڭدا ادەتتەگىدەي ۇكىمەت وتىرىسى ءوتتى.

«2020 جىلى ناقتى سەكتور ەكونوميكالىق درايۆەر بولدى. ونداعى ءوسۋ 2% كورسەتتى. بىلتىر قىزمەت كورسەتۋ ديناميكاسى مينۋس 5,6%-پەن اياقتالدى. سالدارىنان، ءجىو ءوسۋ قارقىنى مينۋس 2,6%-كە كەمىدى»، – دەدى ۇلتتىق ەكونوميكا ءمينيسترى رۋسلان دالەنوۆ.

ونىڭ ايتۋىنشا، ناقتى سەكتور سالالارىنىڭ كوبىندە جانە جەكەلەگەن قىزمەت تۇرلەرىندە ءوسۋ بايقالادى. ولار: قۇرىلىس (11,2%-كە ءوسۋ), اقپارات جانە بايلانىس (8,6%), اۋىل شارۋاشىلىعى (5,6%), وڭدەۋ ونەركاسىبى (3,9%) جانە ءبىلىم بەرۋ(2,3%)سالالارى. سونىمەن قوسا، كەيبىر سالالارداعى تەرىس كورسەتكىشتەرگە قاراماستان، جىل سوڭىنا قاراي كولىك، ساۋدا، عىلىمي-تەحنيكالىق قىزمەت، جىلجىمايتىن مۇلىك پەن وپەراتسيالار جانە كەن ءوندىرۋ ونەركاسىبىندە جاعداي وڭالا باستاعان كورىنەدى.

«ەكونوميكا قۇرىلىمى ساپا جاعىنان وڭ باعىتتا وزگەردى. ونەركاسىپتىڭ جالپى كولەمىندەگى وڭدەۋدىڭ ۇلەسى 9,4 پروتسەنتتىك تارماققا ارتتى، ياعني 2019 جىلعى 39,4%-تەن 2020 جىلى 48,8%-كە دەيىن. جەڭىل ونەركاسىپتىڭ، اۆتوموبيل جاساۋدىڭ جانەدايىن مەتالل بۇيىمدارىنىڭ ەكى ەسەگە ارتقانى بايقالادى. وڭدەلگەن، دايىن تاۋارلاردىڭ ەكسپورتى ۇلعايدى. ءوندىرىستىڭ ءوسىمىنىڭ ارقاسىندا جالپى تۇتىنۋداعى قازاقستاندىق تاۋارلاردىڭ ۇلەسى 4,7 پروتسەنتتىك تارماققا كوبەيدى. ەلەكتروندىق ساۋدا ۇلەسى 6 پروتسەنتتىك تارماققا، قولما-قول اقشاسىز تولەمدەر كولەمى 2 ەسەگە جانە كەن ءوندىرىسىن ەسەپكە الماعاندا ينۆەستيتسيا قورى 14,8%-كە ءوستى»،  – دەپ تولىقتىردى مينيسترلىك باسشىسى.

ساراپشىلار مەن كوزىقاراقتى ازاماتتار بىلتىرعى ەكونوميكا قورىتىندىسى تۋرالى قازاقستان ۇكىمەتىنىڭ تاريحىنداعى ەڭ تومەنگى كورسەتكىش ەكەنىن ايتادى.

پاندەميادان ىلگەرى رۋسلان دالەنوۆ 2020-2024 جىلدارعا ارنالعان الەۋمەتتىك-ەكونوميكالىق دامۋ تۋرالى 2020 جىلعا قازاقستاننىڭ ءجىو-ءنىڭ ناقتى ءوسىمى 4%-تەن اسادى دەپ بولجاعان ەدى.

ەكونوميكا وقۋلىقتارىندا ءجىو-گە «ەسەپتى مەرزىم ىشىندە ەلدە وندىرىلگەن تۇپكى تاۋار مەن قىزمەتتىڭ جيىنتىق نارىقتىق قۇنى» دەگەن انىقتاما بەرىلەدى. تۇسىنىكتىرەك ايتقاندا، ءجىو بەلگىلى ءبىر ۋاقىت ارالىعىندا (جىل/توقسان، ماسەلەن، 2020 جىلى – QT) ەلدە وندىرىلگەن بارلىق تاۋار مەن قىزمەتتى ساتىپ الۋعا قاجەتتى قارجى كولەمىن بىلدىرەدى. بۇل جونىندە كەڭىرەك تانىسقىڭىز كەلسە، «ءجىو جانە ونى قالاي ەسەپتەيدى؟» دەگەن ماتەريالدى وقۋعا بولادى.

"The Qazaq Times"