فوتو: Informburo.kz

قىرعىزستاندا سوورونباي جەەنبەكوۆ جەڭىسىن ءبىر-اق ادام مويىنداعان جوق.

وسى ۋاقىتقا دەيىن قىرعىز ەلىنىڭ قازىرگى پرەزيدەنتى المازبەك اتامباەۆتىڭ ءىزباسارى سوورونباي جەەنبەكوۆتىڭ سايلاۋداعى جەڭىسىن پرەزيدەنت سايلاۋىنا قاتىسقان ۇمىتكەرلەردىڭ ىشىندە ءبىر ادام عانا مويىنداعان جوق. ول سايلاۋدا 6,48 پايىز داۋىس جيناپ، ءۇشىنشى ورىن العان «ءبۇتىن قىرعىزستان» پارتياسىنىڭ وكىلى اداحان مادۋماروۆ. مادۋماروۆتىڭ سوزىنشە، ەل بيلىگى سايلاۋ كەزىندە رەسەي مەن قازاقستانداعى 500 مىڭ قىرعىزستاندىقتى ءتۇرلى سەبەپتەرمەن سايلاۋعا قاتىستىرماي قويعان. ونىڭ ۇستىنە قىرعىزستانداعى 1,5 ميلليون ادام سايلاۋعا قاتىسۋدان باس تارتقان. اداحان مادۋماروۆ سايلاۋدان كەيىن جۋرناليستەر الدىندا سويلەگەن سوزىندە: «ەل حالقىنىڭ جارتىسى قاتىسپاعان سايلاۋدا ورتالىق سايلاۋ كوميسسياسىنىڭ سوزىنشە، سوورونباي جەەنبەكوۆ 54 پايىز داۋىس جينادى. بۇل دۇرىس ەمەس، ول شىن مانىندە 25 پايىز بولۋى ءتيىس» - دەگەن.

ال سوورونباي جەەنبەكوۆتىڭ باستى قارسىلاسى ومىربەك بابانوۆ سايلاۋدان كەيىن جەەنبەكوۆ جەڭىسىنە بايلانىستى قارسى پىكىر بىلدىرمەگەن. ول سايلاۋ قورىتىندىسى جاريالانعاننان كەيىن ءوز جاقتاستارىنا: «ءبىز بيلىك بەلگىلەگەن پايىزداردى الدىق. ءبىزدىڭ جەڭىسىمىز ءالى الدا» - دەپ قىسقا قايىرعان.

سوورونباي جەەنبەكوۆ جەڭىسىنەن كەيىن ونى ەڭ العاشقىلاردىڭ ءبىرى بولىپ رەسەي پرەزيدەنتى ۆلاديمير پۋتين قۇتتىقتادى. ودان كەيىن بارىپ قازاقستان پرەزيدەنتى نۇرسۇلتان نازارباەۆ پەن وزبەكستان باسشىسى شاۆكات ميرزيەەۆ قۇتتىقتاۋ تەلەگرامماسىن جولدادى. ءبىر قىزىعى جوعارىدا اتالعان ءۇش پرەزيدەنتتە قۇتتىقتاۋ حاتتارىندا قىرعىزستاننىڭ قازىرگى پرەزيدەنتى المازبەك اتامباەۆ جايىندا ءبىر اۋىز ءسوز ايتپاعان. ساراپشىلاردىڭ پىكىرىنشە، بۇل قازاقستان، وزبەكستان جانە رەسەي باسشىلارىنىڭ سوورونباي جەەنبەكوۆقا بەرگەن بەلگىلەرى. ولار وسى ارقىلى جەەنبەكوۆكە اتامباەۆ ساياساتىن جالعاستىرۋ كورشىلەس مەملەكەتتەرمەن دوستىق قارىم-قاتىناس ورناتۋدا قيىندىق تۋدىراتىنىن مەڭزەگەن.

جالپى سوڭعى ۋاقىتتاعى المازبەك اتامباەۆتىڭ نۇرسۇلتان نازارباەۆ تاراپىنا قاراتا ءتۇرلى مالىمدەمەلەردى قارشا بوراتۋى تمد ەلدەرى باسشىلارىنىڭ ەشقايسىسىنا ۇناماعانى بەلگىلى. ءتىپتى باق بەتتەرىندە بۇعان رەسەي پرەزيدەنتى ۆلاديمير پۋتين ارالاستى دەگەن دە پىكىرلەر ايتىلعان. بىراق اتامباەۆ قازاق بيلىگىن سىناۋىن جەەنبەكوۆ جەڭىسكە جەتكەنگە دەيىن توقتاتقان جوق. ول ءتىپتى سايلاۋ كۇنى دە رەسمي استانانى سىناپ مالىمدەمە جاسادى. ال قىرعىزستاننىڭ سۋ جاڭا پرەزيدەنتى سوورونباي جەەنبەكوۆ ءوزى جۋرناليستەردىڭ «ءسىز نازارباەۆقا قالاي قارايسىز؟» دەگەن سۇراعىنا: «مەن ول كىسىنى كورشى ەلدىڭ باسشىسى رەتىندە سىيلايمىن. قازاق-قىرعىز شەكاراسىنداعى داۋ ۋاقىتشا ماسەلە» - دەپ قىسقاشا جاۋاپ بەرگەن. ەندى جەەنبەكوۆ جەڭىسىن مويىندامايتىن جالعىز ادامعا قايتىپ ورالساق. ەگەر اداحان مادۋماروۆ 20 كۇن ىشىندە سايلاۋ قورىتىندىسىمەن كەلىسپەيتىندىگىن ايتىپ سوتقا شاعىمدانبايتىن بولسا، وندا سوورونبوي جەەنبەكوۆ كونستيتۋتسيا بويىنشا رەسمي قورىتىندى جاريالانعانان كەيىن 30 كۇن وتكەن سوڭ ياعني جەلتوقساننىڭ 4-ءى كۇنى قىرعىز حالقى الدىندا سالتاناتتى  تۇردە انت بەرەدى.

“The Qazaq Times”