فوتو: Oxu.az.

كاتالونيا جاقىن كۇندەرى ءوز تاۋەلسىزدىگىن جاريالايدى – دەپ مالىمدەدى اۆتونوميا باسشىسى كارلەس پۋچدەمون ۆۆس تەلەارناسىنا بەرگەن سۇحباتىندا.

قازان ايىنىڭ 1-ءى كۇنى وتكەن رەفەرەندۋمنان كەيىن العاش رەت سۇحبات بەرگەن كاتالونيا باسشىسى كارلەس پۋچدەمون: «ەل بيلىگى وسى اپتانىڭ سوڭىندا نەمەسە كەلەسى اپتانىڭ باسىندا يسپانيادان ءبولىنىپ شىعۋعا بايلانىستى ءتيىستى قارار قابىلدايتىن بولادى. قازىرگى تاڭدا كاتالونيا مەن رەسمي مادريد اراسىندا قارىم-قاتىناس تولىقتاي ۇزىلگەن» - دەپ مالىمدەگەن.

پۋچدەمون ۆۆس ءجۋرناليسىنىڭ: «ەگەردە يسپانيا كاتالونيا بيلىگىن ءوز قولىنا كۇشپەن الاتىن بولسا، ءسىز نە ىستەيسىز؟» - دەگەن سۇراعىنا: «بۇل ولاردىڭ ۇلكەن قاتەلىگى بولادى. ەگەر رەسمي مادريد وسىنداي قادامدارعا باراتىن بولسا، وندا بۇل قادام بارلىعىن بۇزادى» - دەپ جاۋاپ بەرگەن.

بۇعان دەيىن يسپانيا كورولى فيليپە VI كاتالونيا بيلىگىن قاتاڭ سىنعا الىپ: «ولار ەل كونستيتۋتسياسىن بۇزۋ ارقىلى زاڭ جانە دەموكراتيا شەڭبەرىنەن شىقتى. ولار يسپانيا تۇتاستىعىنا نۇقسان كەلتىرۋ ارقىلى ونىڭ تاۋەلسىزدىگىنە قاۋىپ ءتوندىردى» - دەپ مالىمدەگەن بولاتىن.

ەستەرىڭىزگە سالايىق، كاتالونيادا تاۋەلسىزدىك الۋعا بايلانىستى رەفەرەندۋم قازان ايىنىڭ 1-ءى كۇنى وتكەن بولاتىن. وعان ەل حالقىنىڭ 42 پايىزى قاتىسىپ، ونىڭ 90 پايىزى دەربەس ەل بولۋدى قولداپ داۋىس بەرگەن. رەفەرەندۋم كۇنى يسپانيا بيلىگى كاتالونياعا ۇلتتىق گۆارديا مەن ارنايى جاساق ساربازدارىن كىرگىزگەن. الاڭعا شىققان حالىق پەن پوليتسيا اراسىنداعى قاقتىعىس سالدارىنان 893 بەيبىت تۇرعىن مەن 33 پوليتسيا قىزمەتكەرى جاراقات العان بولاتىن.

“The Qazaq Times”