فوتو: Tengrinews

قازاقستاندىقتاردىڭ ەنەرگەتيكا كاسىپورىندارى الدىنداعى قارىزى 10 ملرد تەڭگەدەن اسادى. بۇل تۋرالى قر ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ باسشىسى سۇڭعات ەسىمحانوۆ مالىمدەدى.

"حالىق ەنەرگەتيكا كاسىپورىندارىنا 10 ملرد تەڭگەدەن اسا قارىز. قارىزدىڭ كوپ بولىگى، ياعني 3 ملرد تەڭگە الماتى قالاسىنا تيەسىلى. وڭتۇستىك قازاقستان وبلىسى بويىنشا دا قارىز 3 ملرد تەڭگە شاماسىندا. قالعان وبلىستاردا قارىز ءبىر ايلىق كولەمدە قالىپ وتىر", - دەدى ەسىمحانوۆ ورتالىق كوممۋنيكاتسيالار قىزمەتىندە وتكەن بريفينگتە.

ونىڭ ايتۋىنشا، قارىز كولەمى جىلۋ بەرۋ ماۋسىمى باستالار كەزدە ۇنەمى وسىنداي دەڭگەيدە بولادى ەكەن.

"بىزدە جىلۋ ماۋسىمى اياقتالىپ، قايتادان باستالعانعا دەيىن جازدىڭ ءۇش ايىندا قارىزداردىڭ دەڭگەيى ۇنەمى جوعارى بولىپ قالادى. ويتكەنى ەنەرگيا تۇتىنۋشىلار قىس باستالعان كەزدە عانا تولەم جاسايدى جانە قىزمەتتى ۇسىنعاندارعا تالاپ قويا باستايدى. الداعى ءبىر-ەكى ايدا بۇل كورسەتكىش ايتارلىقتاي تومەندەيدى دەپ ويلايمىن", - دەيدى ەسىمحانوۆ.

ايتا كەتەيىك، وسى جىلدىڭ شىلدە ايىندا الماتى قالاسى تۇرعىندارىنىڭ سۋ مەن جىلۋ ءۇشىن قارىزى 660 ملن تەڭگەدەن اساتىنى تۋرالى حابارلانعان. سونداي-اق، كوممۋنالدىق قىزمەت ءۇشىن قارىزى بارلارعا كرەديت بەرىلمەۋى مۇمكىن ەكەنى ايتىلعان ەدى.

“The Qazaq Times”