80 جىلدان استام تاريحى بار ونەردىڭ قارا شاڭىراعى الماتى مەملەكەتتىك قۋىرشاق تەاترى 2017 جىلدىڭ 5 قازان كۇنى ساعات 16.30-دا سالتاناتتى تۇردە كەزەكتى 83-ءشى ماۋسىمىن اشادى. تەاتردىڭ اشىلۋى ارتيستەرىنىڭ قاتىسۋىمەن تەاتر فاسادىنداعى اقىن، دراماتۋرگ يران-عايىپتىڭ «بوشكە» دراماسىنىڭ نەگىزىندە رەجيسسەر ر.جانامانوۆ ساحنالاعان كورىنىسپەن باستالادى. بۇل تۋرالى تەاتردىڭ ءباسپاسوز قىزمەتى حابارلادى.

سونداي-اق، ساعات 17.00-دە ەۆگەني يونوۆتىڭ «انا جۇرەگى» سپەكتاكلىنىڭ پرەمەراسى كورەرمەن نازارىنا ۇسىنىلادى. قويۋشى رەجيسسەرى– انتون زايتسەۆ. قويۋشى سۋرەتشىسى – سەرگەي مەلتسەر. ساحنالىق ءبيىن قويعان– گۇلجان داۋلەتقۇلوۆا. قويىلىم ارقىلى رەجيسسەر ا.زايتسەۆ قۋىرشاق تەاترى ساحناسىنا جاڭا لەپ اكەلدى. پەسانىڭ مازمۇنى اۋىر بولعانمەن، بەرەتىن تاربيەسى مول. كەز كەلگەن جاستاعى كورەرمەننىڭ كوڭىلىن وياتىپ، جۇرەگىنە يمان ۇيالاتپاق. انادان تۋعان جالعىز ۇل جوقشىلىقتى مىسە تۇتپاي، ار كورىپ، اناسىنا قارسى شىعادى. تاس قالانىڭ تاس جۇرەك جاستارىنا قوسىلعان جەتەسىز ۇل، ۇلىم دەپ ەڭىرەگەن انانىڭ كوزجاسى قويىلىمنىڭ باستى يدەياسىن اشىپ كورسەتپەك. بالاسىنىڭ تۋعان كۇنىنە قولىندا قالعان جالعىز جانىپ تۇرعان بالاۋىز شىراقتى سىيعا تارتپاق بولعان انا جۇرەگى سول شىراقپەن بىرگە سونەدى. رەجيسسەر انتون زايتسەۆ وسى ءبىر شىنايى ءومىردى قۋىرشاق ساحناسىندا قۋىرشاق تىلىندە سويلەتپەك.

انا بەينەسىندە– اكتريسا تولقىن تلەۋليەۆا، قۋىرشاق بالا – اكتەر رۋسلان ابۋ جانە كوپشىلىك ساحنادا تەاتر ارتيستەرى ونەر كورسەتەدى.

83-ءشى ماۋسىم جوسپارى:

قازان ايىنىڭ 20-24 ارالىعىندا تۇركيا ەلىندە وتەتىن ءىىى حالىقارالىق تەاتر فەستيۆالىنە «ارىستاننىڭ ۇرەيىن قالاي ەمدەۋ كەرەك؟» (اۆت.: م.دلگەچەۆا، رەج.: ە.توتەۆا-اندوتوۆا) جانە «قۋىرشاق دۋمان» (اۆت. جانە رەج.: س.شۇكىروۆ، ق.ەشمۇراتوۆا) قويىلىمدارىمەن قاتىسۋدى  جوسپارلاپ وتىر.

جاڭا ماۋسىمدا تەاتر ۇجىمى ر.وتارباەۆتىڭ «ساعىنىش ءشوبى»، ە. جۋاسبەكتىڭ «توبا» قويىلىمدارىن، ب.جوراەۆتىڭ «باتىر مەن الاباي»،«قوجا مەن سپورت»،ي.ساپاربايدىڭ «سىعان سەرەناداسى»،ا.گوفماننىڭ«ششەلكۋنچيك» اتتى تۋىندىلارىن كىشكەنتاي كورەرمەندەرگە ساحنالاپ، تارتۋ ەتپەك.

اتالعان ونەر ۇجىمى ساحنالانعان جاڭا قويىلىمداردى ارنايى تەاتر سىنشىلارىنىڭ ساراپتاماسىنان وتكىزۋدى داعدىعا اينالدىرعان.

“The Qazaq Times”