جاقىندا عانا 83-ءشى ماۋسىمىن اشقان قۋىرشاق تەاتر ۇجىمى كەزەكتى III حالىقارالىق انكارا فەستيۆالىنە شاقىرتۋ الدى. ءۇشىنشى رەت وتكەلى وتىرعان فەستيۆالدىڭ ۇيىمداستىرۋشىلارى KUKSADER جانە THEATRE TEMPO ۇيىمدارى، دەپ حابارلايدى تەاتردىڭ ءباسپاسوز قىزمەتى.

ونەر مەرەكەسى وسى جىلدىڭ قازان ايىنىڭ 19-27 ارالىعىندا وتەدى. فەستيۆالدىڭ باستى ماقساتى – قۋىرشاق تەاترى ونەرىنىڭ كوكجيەگىن كەڭەيتىپ، حالىقارالىق ستاندارتقا ساي ەتە وتىرىپ، كاسىبي تەاتر ماماندارى مەن تۇرىك سۋرەتشىلەرى، رەجيسسەرلەرى، پروديۋسەرلەرى مەن قاراپايىم ونەر سۇيەر قاۋىمنىڭ تالابىنان شىعۋ، جاڭا تىنىسىن تانىتۋ.

III حالىقارالىق انكارا تەاتر فەستيۆالىنە بيىل 4 تۇركيالىق جانە 6 شەتەلدىك ونەر ۇجىمدارى قاتىسىپ، باقتارىن سىنايدى. فەستيۆال بارىسىندا قويىلىمداردان تىس ارنايى دارىستەر، سەمينارلار وقىلىپ، قۋىرشاق تەاتر ونەرىنە بايلانىستى كورمەلەر ۇيىمداستىرىلادى.

مەملەكەتتىك قۋىرشاق تەاترى فەستيۆال قاتىسۋشىلارى مەن قوناقتارى نازارىنا «قۋىرشاق دۋمان» (اۆت. جانە رەج.: ق.ەشمۇراتوۆا، س.شۇكىروۆ) جانە «ارىستاننىڭ ۇرەيىن قالاي ەمدەۋ كەرەك؟» (اۆت.: م.دلگەچەۆا، رەج.: ە.توتەۆا-اندوتوۆا) قويىلىمدارىن ۇسىنادى.  

ايتا كەتەرلىك جايت، تەاتر ۇجىمى 2017 جىلدىڭ 28 شىلدە مەن 7 تامىز ارالىعىندا انكارا قالاسىندا (تۇركيا)وتكەن حالىقارالىق تەاتر فەستيۆالىندە «قۋىرشاق دۋمان» (رەج.: ق.ەشمۇراتوۆا) قويىلىمىمەن قاتىسىپ، قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىسىنىڭ اتىنان «قازاقستان مەن تۇركيا اراسىنداعى ديپلوماتيالىق قارىم-قاتىناستاردىڭ 25 جىلدىعى اياسىندا تۇركيا رەسپۋبليكاسىندا قازاق مادەنيەتى مەن ونەرىن تانىتۋعا قوسقان ۇلەسى ءۇشىن» اتتى ارنايى العىس حاتپەن ماراپاتتالعان.

83 جىلدىق تاريحى بار الماتى قالاسىنىڭ مەملەكەتتىك قۋىرشاق تەاترى – رەسپۋبليكامىزداعى  ەڭ ءىرى ونەر ۇجىمدارىنىڭ ءبىرى. ونەر وشاعى بۇگىندە تالانتتى ارتيستەر مەن قۋىرشاق شەبەرلەرىنىڭ، رەجيسسەرلەردىڭ، سۋرەتشىلەردىڭ بىرنەشە ۇرپاعىن تاربيەلەپ شىعاردى. ەلىمىزدە جانە شەت ەلدە وتكەن حالىقارالىق، رەسپۋبليكالىق تەاتر فەستيۆالدەرىندە بيىك بەلەستەردى باعىندىرعان ۇجىمنىڭ العا قويعان باعىتى مەن باعدارى دا ايقىن. ول – قازاقتىڭ قۋىرشاق تەاترى ونەرىن وركەندەتۋ،  كەشەگى مەن بۇگىنگى ءومىر اراسىن ونەردىڭ بيىك شىڭى ارقىلى شىنايى كورسەتە ءبىلۋ.

“The Qazaq Times”