جالالاباد قالاسىندا تالىپتەر "يم" توبىنىڭ شابۋىلىنا ءجيى ۇشىراۋدا. فوتو; BBC

اۋعانستانداعى «يسلام مەملەكەتى» تەررورلىق توبى تالىپتەر ەل بيلىگىنە كەلىپ جاتقان تۇسا كابۋل حالىقارالىق اۋەجايىندا ەكى ۇلكەن جارىلىس جاساعان بولاتىن. بۇل وقيعا شىن مانىندە اۋعانستانداعى ەكى يسلامدىق قارۋلى توپتىڭ ارا جىگىن اشىپ، ءبىر-بىرىنە قارسى قاتال ءارى قاندى قارسىلىققا وتكەنىن كورسەتىپ ەدى. قازىر ەلدىڭ رەسمي بيلىگى رەتىندە حالىقارالىق قاۋىمداستىق پەن كورشىلەس ەلدەر الدىندا مويىندالۋ ءۇشىن «تاليبان» ەلدەگى «يسلام مەملەكەتى» تەررورلىق توبىنا قارسى كۇرەس جۇرگىزىپ جاتقانىن داڭعازالاپ كورسەتىپ جاتىر.

تالىپتەر بيلىككە كەلگەننەن كەيىن اۋعانستاندا قاقتىعىس توقتاپ، قوعام ءبىرشاما تىنىشتالىپ قالعانداي بولعان. الايدا، ەل حالقى «تاليبان» مەن «يسلام مەملەكەتى» اراسىندا جاڭا قاقتىعىستىڭ تۇتانۋىنان الاڭداي باستادى. سەبەبى، سوڭعى اپتالاردا اۋعانستاننىڭ شىعىسىنداعى جالالاباد قالاسىنىڭ ماڭىندا بەلگىسىز ادامدار جاعىنان ولتىرىلگەن مۇردەلەر تابىلىپ جاتىر. ءتۇرلى تاسىلدەرمەن ولتىرىلگەن بۇل مۇردەلەردىڭ قالتاسىنا ۇرەيلى حاتتار سالىنعان، وندا بۇل ادامدى «يسلام مەملەكەتى» توبىنا قوسىلعانى ءۇشىن ولتىرىلگەنى ايتىلعان.

بۇنداي ۇرەي ۇشىرارلىق ىستەردى ەشكىم جاۋاپكەرشىلىگىنە الماعانىمەن ەلدىڭ بيلىگىن قولىنا العان تالىپتەرگە جاۋاپكەرشىلىكتىڭ ارتىلارى ءسوزسسىز. بۇعان قاراپ ەكى ۇيىم ورتاسىنا ماقساتتى ارانداتۋشىلىق ارەكەتى دەيتىن بولجامدار دا بار. قالاي بولماسىن اۋعانستانداعى ەكى توپ اراسىنداعى قاندى ايقاس بۇدان بۇرىن دا باستالىپ كەتكەن ەدى. بۇل قاقتىعىستىڭ نەگىزگى مايدانى نانگارحارداعى جالالاباد شاھارى بولىپ وتىر.

مالىمەتتەرگە ساي اۋعانستاندا «يم» توبىنا تيەسىلى ەشبىر پروۆينتسيا نەمەسە اۋدان جوق. تەك بۇعان دەيىن ناگارحار مەن گۋنار وبلىستارىندا بازالارىنىڭ بار ەكەنى ايىتىلىپ كەلگەن. ونداعى بازالارى دا اقش اۋە كۇشتەرىنىڭ، بۇرىنعى اۋعانستان قارۋلى كۇشتەرىنىڭ جانە تالىپتەر جاعىنان دا بىرنەشە رەت تازالاۋعا ۇشىراعان. قازىر اۋعانستان جەرىندەگى «يم» توبىندا بىرنەشە مىڭ عانا ادام بار دەلىنەدى. الايدا، بۇل توپ ورتالىق ازيا مەن پاكىستانداعى جاقتاستارىن تەز ارادا تارتىپ الۋى دا مۇمكىن.

The Qazaq Times