جەنەۆاداعى ءسۇريا كەلىسسوزدەرىن جالعاستىرۋ ۇسىنىلدى

بۇۇ-نىڭ ءسۇريا ماسەلەسى بويىنشا ارنايى وكىلى ستەفان دە ميستۋرا الداعى اپتادا جەنەۆادا ءسۇريا كەلىسسوزدەرىنىڭ كەلەسى راۋندىن وتكىزۋدى ۇسىندى. ءسۇريا ماسەلەسى بويىنشا تالقىلاۋلاردىڭ 8 راۋندى قازان ايىنىڭ سوڭى قاراشا ايىنىڭ باسىندا وتەدى دەپ جوسپارلانىپ وتىر. بۇل تۋرالى APF اقپاراتتىق اگەنتتىگى جازدى. 

ستەفان دە ميستۋرا ءوز باستاماسىن بىلاي ءتۇسىندىردى: "مەن قوس تاراپتى دا (ۇكىمەت پەن وپپوزيتسيا ماعىناسىندا) ءسۇريا حالقى الدىنداعى وزدەرىنە ارتىلعان جاۋاپكەرشىلىكتى سەزىنىپ، جەنەۆاداعى كەلىسسوزدەرگە قاتىسۋعا شاقىرامىن".

بۇۇ-نىڭ ءسۇريا ماسەلەسى بويىنشا ارنايى وكىلى التى جىلدان استام ۋاقىتقا سوزىلعان سوعىستىڭ سوڭعى نۇكتەسىن قويۋ ءۇشىن جەنەۆادا وسىعان دەيىن وتكىزگەن  7 راۋندتان تۇراتىن باسقوسۋلارى ءساتسىز اياقتالعان بولاتىن. سۇرياداعى وپپوزيتسيا مەن باتىس ەلدەرى باشار ءال اسادتىڭ بيلىكتەن كەتكەنىن قالايدى. دەگەنمەن مەملەكەت باسشىسى اتالعان سۇرانىستى ورىنداۋدان باس تارتىپ وتىر.

استانادا وتكەن ءسۇريا ماسەلەسى بويىنشا كەلىسسوزدەر دەسكالاتسيالىق زونالاردىڭ قۇرىلۋىنا ىقپال ەتىپ، تىنىشتىق ورناتۋ جولىندا بىرقاتار ىلگەرىلەۋشىلىككە الىپ كەلدى. وسىنداي پىكىردى ۇستاناتىن بۇۇ-نىڭ گۋمانيتارلىق ميسسيالار مەن توتەنشە كومەك بويىنشا وكىلى مارك لوۋكوك ءالى دە سۇرياداعى بەيبىت حالىققا كورسەتىلگەن زورلىق تۋرالى اقپاراتتاردى كۇن سايىن الىپ وتىرعانىن جاسىرمادى.

“The Qazaq Times”