فوتو: ۆۆس

يسپانيا بيلىگى كاتالونيانىڭ تاۋەلسىزدىگى ءۇشىن رەفەرەندۋم وتكىزۋ تۋرالى باستاماسىنا توسقاۋىل بولىپ، داۋىس بەرۋ بيۋللەتەندەرىن قولعا ءتۇسىرىپ، جاۋاپتى شەنەۋنىكتەردى سوتقا شاقىرتقان بولاتىن. ولاردىڭ بىرقاتارى، اپتاسىنا ءبىر رەت سوت عيماراتىنا كەلىپ تۇرۋ شارتىمەن بوساتىلعانىمەن، ەلدە جاپپاي جازالاۋ شاراسى ءجۇرىپ جاتقانى بايقالادى. بۇل تۋرالى APF اقپاراتتىق اگەنتتىگى جازدى. 

وسى جىلدىڭ  1 قازانىنا جوسپارلانعان رەفەرەندۋم وتكىزىلەتىن كۇن جاقىنداعان سايىن, كاتالوندىقتارعا كورسەتىلگەن قىسىم كۇشەيىپ كەلەدى. كاتالونياداعى 700 مەردىڭ رەفەرەندۋمعا قولداۋ كورسەتكەنى نە يسپانيانىڭ تۇتاستىعىن ساقتاۋعا قىزمەت ەتكەنى تەكسەرىلىپ جاتىر. بارلىق شەنەۋنىكتەرگە تاعىلعان ايىپ بىرەۋ: "ولار ورتالىق بيلىكتىڭ رەفەرەندۋم وتكىزۋگە جول بەرمەۋ تۋرالى تاپسىرماسىن ورىنداماعان".

وسى ۋاقىتقا دەيىن "رەفەرەندۋمدى عالامتور ارقىلى ناسيحاتتادى" دەگەن كۇدىكپەن web-پاراقشالار جاساعان 17 ادام جاۋاپ بەرۋگە شاقىرىلدى.

2014 جىلى كاتالونيادا ءدال وسىنداي رەفەرەندۋم وتكىزۋ شاراسى قولعا الىنعان كەزدە، سول كەزدە ءوڭىر باسشىسى ارتۋر ماسس پەن ونىڭ جانىنداعى 8 شەنەۋنىككە ەل قازىناسىنا 5,2 ملن ەۋرو تولەۋ مىندەتى جۇكتەلىپ، ونى ورىنداۋعا 15 كۇن بەرىلگەن ەدى. سوتتىڭ ايتۋى بويىنشا، اتالعان قارجى رەفەرەندۋمنىڭ ۇيىمداستىرۋ شاراسىنا كەتكەن.

يسپانيانىڭ سىرتقى ىستەر ءمينيسترى "كاتالونياداعى رەفەرەندۋم جەڭىسكە جەتىپ، ولار تاۋەلسىزدىك تۋرالى دەكلاراتسيا قابىلداعانىمەن، ونى وزدەرىنەن باسقا ەشكىم مويىندامايدى. بارلىعى كاتالونيانى يسپانيانىڭ قۇرامداس بولىگى ەسەبىندە عانا تانيدى", - دەدى.

“The Qazaq Times”