قازاقستان شەتەلدىك تۋريستەر ءۇشىن تانىمال بولا باستادى

2017 جىلدىڭ قاڭتار-ماۋسىم ايىندا قازاقستانعا تۋريستىك ماقساتتا 3,6 ملن ادام كەلگەن. وسىلايشا ساياحاتتاۋشىلاردىڭ كەلۋ كورسەتكىشى الدىڭعى ەكى جىلمەن سالىستىرعاندا ەڭ جوعارعى كورسەتكىشكە يە بولىپ وتىر. مىسالى ءبىر جىل بۇرىنعى كورسەتكىشكە قاراعاندا بيىل كەلگەن تۋريستەر سانى 20,5%-عا وسكەن نەمەسە 605,9 مىڭ ادامعا ارتىق. مۇنداي مالىمەتتەردى finprom.kz اگەنتتىگى كەلتىرىپ وتىر.

ەسكە سالايىق، مۇنداي جوعارعى كورسەتكىش 2013 جىلدىڭ قاڭتار-ماۋسىم ايىندا تىركەلىپ، تۋريستەردىڭ سانى 22,2%-عا وسكەن ەدى. ال 2015-2016 جىلدارى باستاپقىدا 7%-عا، كەيىن 1,2%-عا تومەندەپ كەتكەن.

ەلگە كەلەتىن تۋريستەر سانىنىڭ ارتۋى قوناقۇي-مەيرامحانا سەكتورىنا وڭ اسەر ەتتى. التى ايدىڭ ىشىندە قازاقستانداعى حوستەلدەر، قوناقۇيلەر، ساناتوري، كۋرورتتارعا 416,2 مىڭ شەتەلدىك تۋريست كەلگەن. بۇل وتكەن جىلدىڭ سايكەس كەزەڭىمەن سالىستىرعاندا 28,7%-عا ارتىق.

سونداي-اق، قازاقستانعا جەكە ماقساتتارمەن  (+35,9%) جانە ىسكەرلىك ماقساتپەن كەلگەندەردىڭ دە (+27,5%) سانى وسكەن. ەسكەرەتىن جايت، شەتەلدىك قوناقتاردىڭ كوبى بيزنەس تۋريزم ءۇشىن كەلگەن، ال 2015-2016 جىلدارى تۋريستەردىڭ وز ەركىمەن  ەلگە كەلۋى ايتارلىقتاي قىسقارعان.

سونىمەن شەتەلدىك تۋريستەر ارقىلى قازاقستانداعى 17 كۋرورتتى زونانىڭ 12-ءسى تانىمالدىققا يە بولدى. مىسالى تۋريستەردىڭ قىزىعۋشىلىعىن ارتتىرعان ەڭ تانىمال ورىن قارقارالى كۋرورتى. العاشقى التى ايدا مۇندا كەلۋشىلەر سانى 7,7 مىڭ ادامعا ارتىپ، 16,6 مىڭعا جەتتى.

سونداي-اق، زەرەندىدە دەمالۋشىلار سانى 5,5 مىڭعا كوبەيىپ، 14,5 مىڭ ادامعا جەتسە، الماتى ماڭىنداعى دەمالىس ورىندارىنا كەلۋشىلەردىڭ سانى 5,3 مىڭعا ءوسىپ، 55 مىڭ ادامعا دەيىن كوبەيدى.

“The Qazaq Times”