تۇركىستان قالاسىندا «وڭىرلەردى دامىتۋ» باعدارلاماسى بويىنشا سالىنعان 5 قاباتتى 8 ءۇي پايدالانۋعا بەرىلدى. باسپانا كەزەگىندە تۇرعان الەۋمەتتىك از قامتاماسىز ەتىلگەن وتباسىلار مەن مۇگەدەكتەر جانە جالعىز باستى انالار سىندى 480 وتباسى باسپانالى بولدى، دەپ حابارلادى وڭتۇستىك قازاقستان وبلىسىنىڭ ءباسپاسوز قىزمەتى.

جاڭادان بوي كوتەرگەن «وتىرار» شاعىن اۋدانىنداعى تۇرعىندارعا پاتەر كىلتىن وڭتۇستىك قازاقستان وبلىسىنىڭ اكىمى جانسەيىت تۇيمەباەۆ تابىس ەتتى.

اكىمدىكتىڭ مالىمەتىنشە، 2016 جىلى اتالعان شاعىن اۋداندا 120 پاتەردى قۇرايتىن 2 ءۇي جانە قازاقستاننىڭ يپوتەكالىق كومپانياسى ەسەبىنەن 144 پاتەر پايدالانۋعا بەرىلگەن. ال 480 پاتەردى قۇرايتىن كوپقاباتتى سەگىز ءۇي «وڭىرلەردى دامىتۋ» باعدارلاماسى بويىنشا وبلىس بيۋدجەتىنەن بولىنگەن 3 ملرد 109 ملن تەڭگە قارجىعا سالىنعان. ەندى وسىندا  قونىستانعان وتباسىلاردىڭ بالالارى ءۇشىن قازىرگى كۇندە بالاباقشا، مەكتەپ ماسەلەسىن شەشۋ قاراستىرىلىپ جاتىر ەكەن.

سونىمەن قاتار، قالاداعى 5 مىڭعا جۋىق ازاماتتاردىڭ تۇرعىن ۇيگە دەگەن سۇرانىسىن قاناعاتتاندىرۋ ماقساتىندا «وتىرار» شاعىن اۋدانىنان «قازاقستان يپوتەكالىق كومپانياسى» ارقىلى تاعى دا 6 ءۇيدىڭ قۇرىلىسى جۇرگىزىلمەك. كەلەر جىلى جوسپارلانعان 20 كوپقاباتتى تۇرعىن ءۇي سالىنسا، ودان بولەك 150 كوتتەدج سالىنباق.

“The Qazaq Times”