نازارباەۆ كوپشىلىك سىن ايتقان لاتىن الىپبيىنە قاتىستى پىكىر ءبىلدىردى

قر پرەزيدەنتى نۇرسۇلتان نازارباەۆ قازاقستاندا لاتىن ءالىپبيىن ەنگىزۋگە قاتىستى پىكىرىن ءبىلدىردى. 

"لاتىنعا كوشۋ ءبارىن دە الاڭداتىپ وتىر. بۇل جايىندا كوپ ايتىلدى. ءبىزدىڭ عالىمدار مەنىڭ تاپسىرماممەن ۇزاق ۋاقىت جۇمىس ىستەپ، بارلىق تاريحتى قاراپ  شىقتى", - دەدى پرەزيدەنت اقوردادا وتكەن وتاندىق جانە شەتەلدىك جۋرناليستەرمەن كەزدەسۋى بارىسىندا.

سونداي-اق، ول تۇركى تىلدەس كورشى ەلدەردىڭ تاجىريبەسى قارالعانىن اتاپ ءوتتى.

"كورشى وزبەكستان، تۇركيانىڭ قالاي ەنگىزگەنى ولاردىڭ تاجىريبەسى قارالدى. مەن كومپيۋتەرگە بىردەن قويا سالۋ ءۇشىن نوقات بولماۋ كەرەگىن ايتتىم. ولاردىڭ (وزبەكستان، تۇركيا) نوقاتى، ءۇتىرى بار. ال قازاق تىلىندە تەك وزىنە ءتان 8 ءارىپ بار. وسىلاردى ناقتىلاۋ قاجەت. ماسەلە وسىندا»، - دەدى نازارباەۆ. - كونسەنسۋس بولعاندا، ءتىل ءبىلىمى ماماندارى مەن تاريحشىلار ورتاق كەلىسىمگە كەلگەندە دە مەن جاڭا ءالىپبي جايىندا جاريا ەتەمىن. بۇل ەرتەڭ وسى ءالىپبي قولدانىسقا ەنەدى دەگەن ءسوز ەمەس"

سونداي-اق، نۇرسۇلتان نازارباەۆ  ورىس تىلدىلەر ءۇشىن كيريليتسا دا قولدانىلا بەرەتىنىن جانە 2022 جىلدان باستاپ 1 سىنىپ لاتىن الىپبيىمەن وقيتىنىن اتاپ ءوتتى.

"مەن مۇنى تەز بولادى دەپ ويلايمىن. ويتكەنى، بۇگىندە بارلىق بالالار اعىلشىن تىلىندە وقيدى. ال ول لاتىنشا. سىزدەر مەن ءبىز ءۇشىن دە بۇل ۇلكەن ماسەلە بولماۋى ءتيىس", - دەدى نازارباەۆ.

ايتا كەتەيىك، 11 قىركۇيەك كۇنى پارلامەنتتە لاتىن ءالىپبيىنىڭ نۇسقاسى تانىستىرىلعان ەدى. جاڭا جوبا بويىنشا قازاق تىلىنە ءتان 8 دىبىس قوس ارىپپەن بەرىلەدى. ال بۇل قوعامدا ۇلكەن رەزونانس تۋدىرىپ وتىر.

“The Qazaq Times”