الماتىدا قالالىقتارعا ارنالعان «Open Almaty» اتتى قوعامدىق قابىلداۋ ورنى اشىلدى. بۇل تۋرالى الماتى قالاسى اكىمدىگىنىڭ ءباسپاسوز قىزمەتى حابارلادى. 

اكىمدىكتىڭ مالىمەتىنشە، «Open Almaty» – الماتى اكىمدىگىنىڭ ءتۇرلى ومىرلىك جاعدايلاردى شەشۋ جانە  تۇرعىندارعا قىزمەت كورسەتۋ جونىندەگى  جاڭا جوباسى.

"قوعامدىق قابىلداۋعا كەلگەن ءاربىر جانعا ءتيىستى كەڭەس بەرىلەدى جانە ولار اكىمدىككە، قالا باسقارمالارىنا، پروكۋراتۋراعا، پوليتسياعا، مەملەكەتتىك كىرىس دەپارتامەنتىنە جانە باسقالارعا جولدانعان ءوز وتىنىشتەرىن قالدىرا  الادى", - دەلىنگەن ءباسپاسوز حابارلاماسىندا.

جاڭا قالالىق سەرۆيس ارقىلى قالانىڭ ءاربىر تۇرعىنى نەمەسە قوناعى ءتۇرلى قىزمەتكە قاتىستى ءوز ۇسىنىسى مەن شاعىمىن قالانىڭ قوعامدىق قابىلداۋىنا open-almaty.kz  ينتەرنەت- پورتالى نەمەسە  1308 ءنومىرى بويىنشا جىبەرە  الادى. «Open Almaty» پورتالى بويىنشا ءتۇرلى ومىرلىك جاعدايلاردى شەشۋ الگوريتمىمەن قوسا قالانىڭ  كوممۋنالدى قىزمەت كورسەتۋ ورىندارىنىڭ (جول، ارىق، جىلۋ جۇيەسىن، اۋلا جانە باسقالارىن جوندەۋ) جۇمىستارىمەن تانىسىپ، بايلانىسا الادى.

قوعامدىق قابىلداۋدىڭ فرونت-وفيسىندە قالانىڭ بارلىق اۋداندارىنىڭ، تۇرعىن ءۇي، جۇمىسپەن قامتۋ  جانە الەۋمەتتىك قىزمەت، جولاۋشىلار كولىگى، تابيعي رەسۋرستار مەن ارحيتەكتۋرا باسقارمالارىنىڭ، قالالىق پروكۋراتۋرا، پوليتسيا، مەملەكەتتىك كىرىس  دەپارتامەنتىنىڭ، تجد-ءنىڭ، حقكو-نىڭ، كاسىپكەرلەردىڭ ۇلتتىق پالاتاسىنىڭ وكىلدەرى، مەدياتورلار قىزمەت كورسەتەدى.باسقارمالار باسشىلارى قوعامدىق قابىلداۋلار  وتكىزىپ، قالالىق ءتۇرلى باستامالاردى تانىستىرا الادى.

جاڭا سەرۆيستىڭ جۇمىس كەستەسى قالا تۇرعىندارىنىڭ جۇمىس ۋاقىتىن ەسكەرە وتىرىپ جاسالعان، قىزمەت كورسەتۋ ۋاقىتتارى جاي كۇندەرى ساعات 8.00 دەن 20.00-گە دەيىن، سەنبى كۇندەرى ساعات 10.00 نان 17.00-گە دەيىىن. قابىلداۋ ورنى بايزاقوۆ كوشەسى، 280 (ساتپاەۆ كوشەسىنىڭ قيىلىسى) «الماتى تاۋەرس» ورتالىعىندا ورنالاسقان.

“The Qazaq Times”