رەسەي بانكى قازاقستاننىڭ وپەك كەلىسىمىن ورىنداپ وتىرعانىنا كۇمانمەن قارايدى

مۇناي ەكسپورتتاۋشىلار اقش، قازاقستان، ازەربايجان جانە باسقا دا ەلدەردىڭ شيكىزات ءوندىرىسىن ارتتىرۋىنا بايلانىستى الەمدىك نارىقتى تەڭگەستىرە الماي وتىر. مۇنداي مالىمدەمەنى رەسەيدىڭ ورتالىق بانكى قىركۇيەك ايىنا ارنالعان ماكروەكونوميكالىق ەسەبىندە جاريالادى. ولاردىڭ سوزىنشە، اتالعان ەلدەر وپەك پەن وعان مۇشە ەمەس ەلدەردىڭ مۇناي ءوندىرۋدى شەكتەۋ تۋرالى كەلىسىمىن بۇزىپ وتىر. 

ايتا كەتەيىك، مۇناي ەكسپورتتاۋشى ەلدەر اراسىنداعى شيكىزات ءوندىرىسىنىڭ كولەمىن قىسقارتۋ تۋرالى كەلىسىم 2018 جىلدىڭ ناۋرىز ايىنا دەيىن جارايدى. كەلىسىم بويىنشا وپەك-كە مۇشە ەلدەر ءوندىرىس كولەمىن تاۋلىگىنە 1,2 ملن باررەلگە قىسقارتۋى ءتيىس. ال كارتەلگە مۇشە ەمەس ەلدەر  شيكىزات كولەمىن تاۋلىگىنە 558 مىڭ باررەلگە قىسقارتۋعا مىندەتتەلگەن ەدى.

ال قازاقستان بولسا شيكىزاتتى تاۋلىگىنە 20 مىڭ باررەلگە از وندىرۋگە كەلىسكەن. الايدا تاراعان اقپارات بويىنشا قازاقستان ءوندىرىستى ازايتۋدىڭ ورنىنا كەرىسىنشە كوبەيتكەن بولۋى مۇمكىن.

ء"ازىربايجان، قازاقستان، مەكسيكا جانە وماننىڭ شيكىزات كولەمىن ازايتۋ تۋرالى كەلىسىم كۆوتاسىنا قاتىسۋ دەڭگەيى 70% عانا", - دەلىنگەن رەسەيدىڭ ورتالىق بانكىنىڭ بيۋلەتەنىندە.

ايتا كەتەيىك، بۇدان بۇرىن دا وپەك ۇيىمى "قازاقستان مۇناي كولەمىن شەكتەۋگە قاتىستى بۇرىنعى كەلىسىمدى ورىنداماعان بولۋى مۇمكىن" دەگەن اقپارات تاراتقان. ولار "الداندىق" دەگەندەي كەيىپ تانىتىپ، "قازاقستان كۆوتا بويىنشا كەلىسىم اياسىندا ءوندىرىستى قىسقارتپاعان" دەگەن ەدى.

مۇناي - قازاقستان ەكونوميكاسىن تۇراقتاندىرىپ وتىرعان باستى نارىق. ال ونىڭ كولەمىن قىسقارتا سالۋ بيلىككە وڭاي تيمەسى انىق. سوندىقتان باسقالاردىڭ "قازاقستان كەلىسىمدى ورىندامادى" دەۋى ورىندى ءسوز بولۋى ىقتيمال.

“The Qazaq Times”