وپەك+ ەلدەرى مۇناي ءوندىرۋ كولەمىن تاۋلىگىنە 9,7 ميلليون باررەلگە قىسقارتۋعا كەلىستى. ەندى ءبىرىنشى مامىردان باستاپ ەكى اي مەرزىمگە بەلگىلەنگەن كەلىسىم جۇزەگە اسادى.

نەگىزىنەن تاراپتاردىڭ ورتاق مامىلەگە كەلۋىنە اقش پرەزيدەنتى ترامپ سەبەپكەر بولعان. اق ءۇي باسشىسى ساۋد ارابياسى مەن مەكسيكا اراسىنداعى شيەلەنىستى شەشۋ ءۇشىن كەلىسسوزدەرگە قوسىلىپ، مۇناي ءوندىرۋدى قىسقارتۋ بويىنشا مەكسيكا مىندەتتەمەلەرىنىڭ ءبىر بولىگىن ءوز موينىنا الدى. دونالد ترامپتىڭ ايتۋىنشا، امەريكا ەنەرگەتيكا سالاسىندا ءجۇز مىڭداعان جۇمىس ورنىن ساقتاپ قالادى.

وپەك+ وتىرىسىنىڭ قورىتىندىسىنا قۇراما شتاتتارىمەن قاتار، رەسەي تاراپى دا وڭ باعا بەرىپ وتىر. ەلدىڭ ەنەرگەتيكا ءمينيسترى الەكساندر نوۆاكتىڭ سوزىنشە، وسى ماسەلەنى شەشۋ جولىندا قانداي دا ءبىر قادام جاسالماعاندا، الەمدەگى مۇناي قويمالارى 1 جارىم ايدىڭ ىشىندە-اق تولىپ قالار ەدى.

"The Qazaq Times"