عالىمدار برازيليانىڭ تابيعاتىنا الاڭدايدى

حالىقارالىق عىلىمي قاۋىمداستىق برازيليانىڭ تابيعاتى ءۇشىن الاڭدايدى. اتالعان مالىمدەمە الەمنىڭ 65 ەلىنەن جينالعان مىڭعا جۋىق ەكولوگ عالىمدار برازيليانىڭ وڭتۇستىگىندەگى فوس-دە-يگۋاسۋدە باس قوسقاننان كەيىن جاسالدى. 

برازيليانىڭ پرەزيدەنتى ميشەل تەمەر سوتتىڭ كومەگىمەن ەرەكشە قورعاۋدا بولعان امازونكا ورماندارىنا قول سۇقپاۋ تۋرالى دەكرەتتىڭ كۇشىن جويدى. ەل ۇكىمەتى امازونكا ورماندارىنان پايدالى قازبالار ءوندىرۋدى قولعا الۋدى جوسپارلاپ وتىر.  بيلىكتىڭ بۇل قادامىنا قارسى ەل ىشىندە قارسىلىقتار مەن شەرۋلەر بولعانىنا قاراماستان، قورشاعان ورتانىڭ تابيعي قالپىن ساقتاپ قالۋ تۋرالى ۇسىنىستار ازىرگە ەسكەرىلمەي وتىر.

عالىمداردىڭ ءبىرى "برازيليا لاتىن امەريكاسىنداعى كوشباسشى مەملەكەت بولعانىمەن، ەكولوگيالىق ماسەلە جونىنەن الدىڭعى قاتارعا شىعا الماي وتىر" دەگەن پىكىرىن ءبىلدىردى. زەرتتەۋشىلەر توبى كۇرت ازايعان بيۋدجەتتى قايتا تولتىرۋ ءۇشىن امازونكا ورماندارىنا وراسان شىعىن كەلتىرەتىن رەسۋرستاردى ءوندىرۋ جۇمىستارىن باستاۋعا قارسى ەكەندىكتەرىن جەتكىزدى.

“The Qazaq Times”