فوتو: baribar.kz

2017 جىلدىڭ 25 تامىزىن قوسا العاندا مەديتسينالىق ساقتاندىرۋ قورىنا تۇسكەن اۋدارىمدار مەن جارنالاردىڭ جالپى مولشەرى 5,44 ملرد تەڭگەدەن استى. ونىڭ 4,27 ملرد تەڭگەسى (جالپى سومانىڭ 78,5%) جۇمىس بەرۋشىلەردىڭ قاراماعىنداعى جۇمىسكەرلەر ءۇشىن جاساعان اۋدارىمدار، دەپ حابارلايدى قوردىڭ ءباسپاسوز قىزمەتى.

ال 1,17 ملرد تەڭگە (21,5%) - جەكە كاسىپكەرلەر مەن ازاماتتىق-قۇقىقتىق سيپاتتاعى كەلىسىمشارت نەگىزىندە ەڭبەك ەتەتىن تۇلعالاردىڭ جارنالارى.

ساقتاندىرۋ جارناسىن تولەۋ جاعىنان استانا مەن الماتى قالالارى، سونداي-اق، قاراعاندى جانە شىعىس قازاقستان وبلىستارى كوش باستاپ تۇر.

بولجام بويىنشا، 2017 جىلدىڭ سوڭىنا دەيىن قورعا 23 ملرد تەڭگەگە جۋىق ساقتاندىرۋ جارناسى (اۋدارىمدارى) ءتۇسۋى ءتيىس (ونىڭ 95 پايىزى – اۋدارىمدار، 5 پايىزى – جارنالار).

ايتا كەتەيىك، شىلدە ايىندا قوردىڭ قر ۇلتتىق بانكىندەگى شوتىنا 800 ملن تەڭگەدەن استام قاراجات تۇسكەن بولاتىن.

ەسكە سالايىق، 1 ءشىل­دە­دەن باستاپ جۇمىس بەرۋ­شىلەر مەن جەكە كاسىپكەرلەر جانە ازا­مات­تىق-قۇقىقتىق كەلىسىمشارت (اقك) نەگىزىندە ەڭبەك ەتەتىن تۇلعا­لار جارنا تولەۋدى باستاپ كەتتى. زاڭعا سايكەس، جۇمىس بەرۋشىلەر بيىل جۇمىسكەر جالاقىسىنىڭ 1 پايى­زى كولەمىندە اقشا اۋدارادى. بىراق اۋدارىم سوماسى 3669 تەڭگەدەن اسپاۋى ءتيىس (15 ەڭ تومەنگى جالاقىنىڭ 1%).

جەكە كاسىپ­كەر­لەر مەن وسى ساناتقا تەڭەستىرىلگەن تۇلعالار، ياعني، جەكە مەن­شىك نوتاريۋستار مەن سوت ورىن­داۋشىلارى، ادۆوكاتتار، كا­سى­بي مەدياتورلار قورعا 2 ەڭ تومەنگى جالاقىنىڭ 5 پايىزىن اۋدارادى. ناقتىراق ايتقاندا، جارنا ءمول­شەرى 2017 جىلى – 2446 تەڭگەنى قۇرايدى. وعان قوسا، جەكە كاسىپكەرلەر قاراماعىنداعى قىزمەتكەرلەر ءۇشىن جۇمىس بەرۋشى رەتىندە جارنا اۋدارادى.

سونىمەن قاتار، 1 شىلدەدەن باستاپ ازاماتتىق-قۇقىقتىق كەلىسىمشارت نەگىزىندە ەڭبەك ەتەتىن ازاماتتار تابىسىنىڭ 5 پايىزىن اۋدارۋى ءتيىس. بۇل توپتاعىلار تولەيتىن جارنانىڭ جوعارعى مولشەرى 3669 تەڭگەدەن اسپايدى.

ءمامس شەڭبەرىندەگى مەديتسينالىق كومەك 2018 جىلدىڭ 1 قاڭتارىنان باستاپ كورسەتىلە باستايدى.

“The Qazaq Times”