قحر پاسپورتى. فوتو: RFA.

ازاتتىق ازيا راديوسى قىتاي ءتىلى ءبولىمىنىڭ 18 تامىزداعى حابارىندا، شىنجاڭداعى التاي ايماعىندا تاعى ءبىر ازاماتتىڭ جەكە پاسپورتىن جەرگىلىكتى بيلىك الىپ العانى تۋرالى ايتىلدى. سونىمەن بىرگە، اتالعان ايماقتا 2008 جىلعى بەيجىڭ وليمپياداسىنىڭ قولا جۇلدەگەرى قانات يسلام تۋرالى ايتۋعا تيىم سالدى دەپ جازدى. ونىڭ سەبەبىن "قانات ايماقتاعى قازاقتاردى قازاقستانعا قونىس اۋدارۋعا ۇگىتتەيدى" دەپ كورسەتكەن. ازاتتىق ازيا راديوسى جەرگىلىكتى بيلىكتى ونداعى ەتنيكالىق قازاقتاردىڭ قازاقستانعا قونىس اۋدارۋىنا توسقاۋىل جاساپ وتىر دەپ ايىپتايدى.

وسى حاباردىڭ جالعاسىندا، التاي قابا اۋدانىندا ەكى مۇسىلمان ازاماتىنىڭ مەشىتتە دۇعا ەتكەنى ءۇشىن ۇستالعانىن، ءارى جاسىرىن تۇردە بەس جىلعا سوتتالعانى تۋرالى ايتىلادى. جەرگىلىكتى ۇكىمەت بارىنشا تۇرعىنداردىڭ قونىس اۋدارۋىن شەكتەۋ شارالارىن اتقارىپ وتىرعانىن ايتادى.

اتالعان راديو تىلشىسىنە جەرگىلىكتى قازاق ازاماتى جاۋاپ بەرىپ:  «ايماقتا قازاقتاردىڭ پاسپورتتارىن جيناپ الۋ قايتا جانداندى. قونىس اۋدارعىسى كەلەتىن ءبىر وتباسىنداعى ايەلىنىڭ پاسپورتىن الىپ الدى. ول بىرنەشە رەت پاسپورتىن قايتارۋ تۋرالى وتىنگەن. سوڭىندا، التاي ايماقتىق قوعام قاۋىپسىزدىك ورگانى جاعىنان 15 كۇندىك ساياسي ۇيرەنۋگە اكەتىلدى»، – دەگەن.

ال، ازاتتىق ازيانىڭ ۇيعىر تىلىندەگى بولىمىندە اقش-تىڭ «2016 جىلعى ءدىن ەركىندىگى مالىمدەمەسى» تۋرالى حابارلاعان. اقش مەملەكەتتىك حاتشىسى رەكس تيللەرسون 16 تامىزدا جاساعان مالىمەتى بويىنشا، قىتاي ۇكىمەتىنىڭ ەلدەگى ازاماتتاردىڭ ءدىني نانىم-سەنىم قۇقىعىنا قول سۇعىپ وتىر دەپ ايىپتادى. 2016 جىلدان بەرى قىتاي بيلىگىنىڭ ۇلتتاردىڭ نانىم-سەنىم بوستاندىعىنا وراسان زور دەڭگەيدە قول سۇققانى تۋرالى ايتتى. اسىرەسە، شىنجاڭداعى جاعدايدى ەكسترەميزمگە قارسى كۇرەس ارەكەتىن، ونداعى ۇلتتاردىڭ ءدىني سەنىمدەرىن بۇزۋعا پايدالاندى دەلىنگەن.

قىتاي جاق تيللەرسوننىڭ مالىمدەمەسىن، ءبىر ەلدىڭ ىشكى ىسىنە ارالاسۋشىلىق دەپ سىنعا العان.

“The Qazaq Times”