رەسەي قازاقستانعا سلادكوە كولىن بەرمەيدى

رەسەي قازاقستانعا نوۆوسيبيرسك وبلىسىنداعى سلادكوە كولىن بەرمەگەنىن مالىمدەدى.

نوۆوسيبيرسك وبلىسىنىڭ زاڭنامالىق كەڭەس توراعاسىنىڭ ورىنباسارى اندرەي پارفەنوۆ سلادكوە كولىن تولىقتاي قازاقستان اۋماعىنا وتكەندىگى جايىنداعى اقپاراتتى جوققا شىعاردى. ول رەسەيدىڭ «كومەرسانت» باسىلىمىنا بەرگەن سۇحباتىندا: «بۇنىڭ بارلىعى قاڭقۋ ءسوز. كولدىڭ ءبىر بولىگى بىزدىكى. بۇرىن ەكى ەل اراسىنداعى شەكارا قالاي بولسا، سول قالپىندا قالدى. قالاي عانا ەلىڭنىڭ ءبىر بولىگىن وزگە بىرەۋگە بەرىپ جىبەرۋگە بولادى؟» - دەگەن.

ەستەرىڭىزگە سالايىق، كەشە تامىزدىڭ 15-ءى كۇنى رەسەيدىڭ نوۆوسيبيرسك وبلىسىنا قاراستى كۋپينسك اۋدانىنىڭ باسشىسى ۆلاديمير شۋبنيكوۆ سلادكوە كولى تولىقتاي قازاقستان يەلىگىنە ءوتتى دەگەن اقپارات تاراتقان بولاتىن. ونىڭ بۇل مالىمدەمەسىنەن كەيىن جەرگىلىكتى حالىق نارازىلىق ءبىلدىرىپ، شۋبنيكوۆ باق وكىلدەرىمەن سويلەسۋدەن باس تارتقان ەدى.

قازىرگى ۋاقىتتا سلادكوە كولىنىڭ 30 پايىزى قازاقستانعا، 70 پايىزى رەسەيگە تيەسىلى.

“The Qazaq Times”