ەۋروكوميسسيا "جۇمىرتقا داۋى" بويىنشا كەزدەسۋ وتكىزەدى

قۇرامىنان ۋلى فيپرونيل تابىلعان جۇمىرتقالار ەۋروپانىڭ 15 مەملەكەتى مەن شۆەيتسارياعا تارالىپ، ۇلكەن داۋعا ۇلاستى. وسىعان وراي قالىپتاسقان ماسەلەنى تالقىلاپ، ورتاق قورىتىندى شىعارۋ ءۇشىن ەۋروكوميسسيا وسى جىلدىڭ 26 قىركۇيەگىندە باسقوسۋ وتكىزەدى. بۇل تۋرالى APF اقپاراتتىق اگەنتتىگى جازدى. 

ينسەكتيتسيدپەن زاقىمدالعان ميلليونداعان جۇمىرتقالار ەۋروپا دۇكەندەرى سورەلەرىنەن الىنىپ، ونداعان قۇس فابريكالارى جابىلدى. نيدەرلاندى، بەلگيا مەن گەرمانيا ءبىرىن-ءبىرى  فيپرونيلدىڭ تارالىمى تۋرالى بىلە تۇرا، قالعان ەۋروپا مەملەكەتتەرىن قۇلاقتاندىرماعان دەپ ايىپتاپ، ازىق-تۇلىك قاۋپىن جاسىرعان كىنالىلەردى تابۋ توڭىرەگىندەگى  داۋ ءورشىدى.

ەۋروپانىڭ ازىق-تۇلىك قاۋىپسىزدىگى مەن دەنساۋلىق ساقتاۋ ماسەلەلەرى جونىندەگى كومميسسارى ۆيتەنيس ەندريۋكايتيستىڭ پىكىرىنشە، الداعى جوسپارلانعان كەزدەسۋ ەڭ الدىمەن، ەۋروپا مەملەكەتتەرىنىڭ ءبىرىن-ءبىرى ايىپتاپ، الەم الدىندا ۇياتقا قالۋ پروتسەسىن دوعارۋ ءۇشىن قاجەتتى شارا. ول قاراما-قايشى پىكىرلەردى قويىپ، بۇل داعدارىستى بىرىگىپ ەڭسەرۋ كەرەك دەپ ەسەپتەيدى.

وسى اپتادا فرانتسيانىڭ اۋىل شارۋاشىلىق ءمينيسترى ستەفان تراۆەرت بەلگيا مەن نيدەرلاندىدان كەلگەن 250 مىڭ جۇمىرتقادان فيپرونيل تابىلعانىن جەتكىزدى. ءدال وسىنداي مالىمدەمە جاساعان ەلدەر قاتارىندا بەلگيانى ايىپتاپ وتىرعان دانيا مەن گەرمانيادان جۇمىرتقا ساتىپ العان پولشا دا بار.

ەۋرووداق اتالعان جۇمىرتقا داۋى كەسىرىنەن اۋرۋحاناعا تۇسكەن ناۋقاستار تىركەلمەگەنىن ايتقانىمەن، دۇنيەجۇزىلىك دەنساۋلىق ساقتاۋ ۇيىمى ءفيپرونيلدىڭ ادامنىڭ باۋىرى مەن بۇيرەگىنە جانە قالقانشا بەزىنە وتە قاۋىپتى ەكەنىن العا تارتىپ وتىر.

تاعى ءبىر اتاپ وتەتىن جايت، وسى اپتادا گونكونگقا نيدەرلاندىدان جۇمىرتقا تاسىمالدانعانى بەلگىلى بولدى. گونكونگتىڭ دەنساۋلىق ساقتاۋ ءمينيسترى سوفيا چان ەۋروپادان كەلەتىن تاۋارلار ينسپەكتسياسىنىڭ كۇشەيەتىندىگىن مالىمدەدى. گونكونگ - ەۋروپانى دۇرلىكتىرگەن "جۇمىرتقا داۋىنا" قاتىسى بار بولۋى مۇمكىن العاشقى ازيالىق قالا.

“The Qazaq Times”