ۆەنەسۋەلا اسكەرى نيكولاس مادۋرونىڭ ءومىرىن قورعاۋعا كەلدى

ۆەنەسۋەلا پرەزيدەنتى نيكولاس مادۋرونى ۇلتتىق ارناعا بەرگەن سۇحباتىنان كەيىن ەلدىڭ اسكەري باسشىلىعى تولىق قۇرامدا كۇتىپ الدى. ولار وزدەرىنىڭ ارەكەتىن جۋىردا ۆەنەسۋەلادا ورىن العان اسكەري بازاعا شابۋىلدان سوڭ، مەملەكەت باسشىسىنىڭ ومىرىنە قاۋىپ ءتونىپ تۇر دەگەن كۇدىكپەن بايلانىستىردى. بۇل تۋرالى APF اقپاراتتىق اگەنتتىگى جازدى. 

ءۇش تانك پەن جۇزدەگەن جاۋىنگەردى الىپ كەلگەن ۆەنەسۋەلا قارۋلى كۇشتەرىنىڭ قولباسشىسى، گەنەرال ۆلاديمير پادرينو وسى ارقىلى حالىققا "اسكەردىڭ رۋحى مەن بىرلىگىن" كورسەتكىسى كەلگەن سياقتى. پادرينو ۆالەنسيادا بولعان وقيعا تۋرالى جاڭا مالىمەتتەر بەردى. ونىڭ اقپاراتىنا سايكەس، 3 ساعاتقا سوزىلعان قاقتىعىس بارىسىندا، 8 ادام قولعا ءتۇسىپ، ەكى شابۋىلشى قازا تاپقان. ەل اسكەرىنە قارسى قارۋ الىپ جۇگىرگەن توپتىڭ قاتارىندا ۇلتتىق گۆارديا كاپيتانى حۋان كارلوس كاگۋاريپانو مەن بۇرىنعى لەيتەنانت دجەففەرسون گابريەل گارسيا دا بولعان.

نيكولاس مادۋرونىڭ ويىن جالعاپ، ۆالەنسياداعى وقيعانى "تەررورلىق اكت" دەپ اتاعان پادرينو: "حۋان كارلوس كاگۋاريپانو 2014 جىلى قۇقىقبۇزۋشىلىق ارەكەتتەرى ءۇشىن اسكەر قاتارىنان شىعىپ قالعانىن، ال گابريەل گارسيا قارۋ-جاراق قويماسىندا قىزمەت ەتكەن. ول ساتقىندىق جاساپ، باسقىنشىلارعا ەسىكتى اشىپ بەرگەن", - دەپ مالىمدەدى. بىراق ول اسكەريلەردى  وز ارىپتەستەرىنە قارسى قويعان قانداي فاكتور ەكەنى تۋرالى جاق اشپادى.

شابۋىلدان بۇرىن الەۋمەتتىك جەلىدە ارنايى بەينەجازبا جاريالاعان اسكەري فورما كيگەن ازاماتتار "ادىلەتتى سايلاۋ مەن اۋىسپالى دەموكراتيالىق  بيلىك" ءۇشىن كۇرەسەتىندىكتەرىن حابارلاعان.

ەل ىشىندەگى بيلىكتىڭ ارەكەتتەرىن قولدامايتىن كوزقاراس اسكەر اراسىندا دا كەڭىنەن تارالىپ كەلە جاتقانىن جەتكىزگەن وپپوزيتسيا جەتەكشىسى حۋليو بورحەس ۇكىمەتتەن جەكسەنبى كۇنى ورىن العان وقيعانىڭ اقيقاتىن بۇرمالاماي جاريالاۋدى تالاپ ەتتى.

“The Qazaq Times”