1 ءساۋىر رەسەيدە ارميا قاتارىنا جاڭا اسكەرلەر قابىلداۋدىڭ كوكتەمگى ناۋقانى رەسمي باستالدى. پرەزيدەنت پۋتين اسكەر قاتارىنا 134 مىڭ 500 جاڭا سارباز شاقىرۋ جونىندە بۇيرىق بەردى. بۇل ارينە ۋكراينا جەرىندە سوعىس باتپاعىنا باتىپ جاتقان ەلدىڭ ارمياسىنا قاجەتتى سان، الايدا رەسەيدىڭ وزىندە اسكەر قاتارىنا وتۋگە دەگەن بەلسەندىلىكتەن كورى نارازىلىق باسىم ەكەنى بايقالادى.

ەلدىڭ قورعانىس ءمينيسترى شويگۋ وتكەن اپتاداعى مالىمدەمەسىندە بيىلعى جىلى ارميا سابىنا قوسىلعان جاس ساربازدار ەشقانداي سوعىس مايدانىنا نەمەسە باسقا دا قاقتىعىس وشاقتارىنا تارتىلمايدى دەگەن ۋادەسىن بەردى. بۇنىسى ارينە اسكەر قاتارىنا وتۋگە نارازى جاستاردى ىنتالاندىرۋ ءۇشىن ايتىلعانى بەلگىلى.

ەل ازاماتتارى شويگۋدىڭ ۋادەسىنە سەنە الماي وتىر. سەبەبى، جەتەرلىك دايىندىقتان وتپەگەن جاس ساربازداردىڭ سوعىسقا تارتىلىپ كەتۋى رەسەي تاريحىندا بولعان. شەشەنستانداعى سوعىس تا سونىڭ ءبىرى. قازىردىڭ وزىندە ۋكراينادا قولعا تۇسكەن رەسەيلىك ساربازدار اراسىندا ارميا قاتارىندا كوپ بولماعان جاس ساربازداردىڭ دا كوپ ەكەنىن بايقايمىز.

رەسەي فەدەراتسياسىنىڭ زاڭى جاسى 18-27 ارالىعىنداعى بارلىق ەر ازاماتتاردى ءبىر جىل اسكەري قىزمەتتە بولۋعا مىندەتتەگەن. الايدا، باسىم كوبى دەنساۋلىق جاعدايىن نەمەسە جوعارى وقۋ ورىنداعى وقۋىن العا تارتىپ اسكەر بولۋدان جالتارۋعا تىرىسادى.

The Qazaq Times