فوتو: youtube.com

كرەملدىڭ ءباسپاسوز حاتشىسى دميتري پەسكوۆ جۋرناليستەرمەن وتكەن ءباسپاسوز كونفەرەنتسياسىندا: ء"سۇريادا باشار اسادتى قولداپ، مەملەكەتتىك كۇشتەردىڭ قاتارىندا كۇرەسىپ جۇرگەن رەسەيدىڭ قاراپايىم ازاماتتارى - ەرىكتىلەر. سوندىقتان رەسەي ۇكىمەتى مەن قورعانىس ءمينيسترى ولارعا قاتىستى شارا قولدانا المايدى", - دەپ مالىمدەدى. بۇل تۋرالى Reuters اگەنتتىگى جازادى. 

رەسەيدىڭ قورعانىس مينيسترلىگىنىڭ مالىمەتىنشە، وسى جىلى سۇرياداعى سوعىستا 10 اسكەري قازا تاپقان. Reuters اگەنتتىگىنىڭ جۇرگىزگەن تاۋەلسىز ساراپتاماسى بۇل كورسەتكىش مەملەكەت ۇسىنعان رەسمي دەرەكتەردەن بىرنەشە ەسەگە ارتىق دەپ، قۇربانداردىڭ سانى 40 ەكەنىن العا تارتادى. مۇنان الدىڭعى ەسەپتە 15 ايدا 36 اسكەري كوز جۇمعانى بەلگىلى بولسا، سوڭعى 7 ايدىڭ وزىندە 40 ادامنىڭ قازاسى ورىن العانى انىقتالدى. بۇل رەسەي سوعىس الاڭىندا ءوز اسكەرىن كوز ىلەسپەس جىلدامدىقپەن جوعالتىپ جاتقانىن كورسەتەدى.

اگەنتتىك قىزمەتكەرلەرى قۇربانداردىڭ ءولىمى تۋرالى دەرەكتى كوپ جاعدايدا ولاردىڭ جاقىندارى، ال 10 جاعدايدىڭ توعىزىندا "سۋىق حاباردى" جەرگىلىكتى اقپارات كوزدەرى مەن الەۋمەتتىك جەلىلەردەگى اقپارات راستاعانىن ايتادى.

Reuters اگەنتتىگى: "رەسەي ۇكىمەتى حالىق اراسىندا سۇرياداعى سوعىستا قازا تاپقانداردىڭ سانىن ازايتىپ كورسەتۋگە، شىنايى دەرەكتەردى جاسىرۋعا تىرىسادى. بۇل ماقساتتا ءولىم قۇشقان اسكەريلەردىڭ وتباسى مەن جاقىندارىنا، "ۇندەمەۋلەرى" ءۇشىن اقشا بەرەدى، مەملەكەتتىك باق-تاردا ءسۇريا داعدارىسى جونىندە نەگىزىنەن ءپوزيتيۆتى نوتاداعى ماقالالار جازىلادى", - دەي كەلە بۇل ءىس-ارەكەتتەردى ۆلاديمير ءپۋتيننىڭ كەلەسى جىلعى پرەزيدەنتتىك سايلاۋدا بيلىكتى قايتا ءوز قولىنا العىسى كەلەتىندىگىمەن بايلانىستىرادى.

اگەنتتىكتىڭ جەكە زەرتتەۋلەرىنە سۇيەنىپ شىعارعان تاعى ءبىر قورىتىندىسى - ءسۇريادا سوعىسىپ جۇرگەندەردىڭ ىشىندە، تاياۋ شىعىستاعى داعدارىسقا اتتانعانعا دەيىن رەسەي اسكەري بولىمشەلەرىندە  كەلىسىمشارت نەگىزىندە جۇمىس ىستەگەن ازاماتتار دا  بار، ال مەملەكەت مۇنى جاسىرىپ وتىر. ويتكەنى رەسەيدىڭ زاڭى بويىنشا، ولار مەملەكەتتىڭ اتىنان شەت ەلدەگى سوعىس وپەراتسيالارىنا جىبەرىلمەۋى كەرەك.

“The Qazaq Times”