فوتو: Reuters

مەكسيكانىڭ سىرتقى ىستەر مينيسترلىگى ۆەنەسۋەلادا وتكەن سايلاۋدىڭ قورىتىندىلارىن مويىندامايتىنىن مالىمدەدى. وعان دەيىن ارگەنتينا، كولۋمبيا، پەرۋ مەملەكەتتەرى دە ۆەنەسۋەلا بيلىگىنىڭ ارەكەتىن ايىپتاپ، وتكىزىلگەن سايلاۋ دەموكراتيالىق پرينتسيپتەرگە قايشى كەلەتىن ديكتاتۋرانىڭ كورىنىسى ەكەندىگىن اشىپ ايتىپ ەدى.  بۇل تۋرالى BBC اقپاراتتىق اگەنتتىگى حابارلادى.

وتكەن جەكسەنبىدە ۆەنەسۋەلادا ەل كونستيتۋتسياسىنا  وزگەرىستەر ەنگىزۋ ماقساتىندا جۇمىس ىستەيتىن قۇرىلتاي جينالىسىنا سايلاۋ ءوتتى. بۇل سايلاۋدىڭ وتۋىنە حالىق جانە وپپوزيتسيا تاراپىنان قارسىلىقتار اعىمداعى جىلدىڭ ءساۋىر ايىنان باستاپ جالعاسىپ كەلەدى.

بيلىك وكىلدەرى سايلاۋعا حالىقتىڭ 41,5 پايىزى قاتىستى دەپ جاريالاعانىمەن، الەم قاۋىمداستىعى جانە جەرگىلىكتى وپپوزيتسيا بۇل مالىمەتتەرگە سەنبەيدى. ولار "سايلاۋعا كەلىپ، داۋىس بەرگەندەر ەل ۇكىمەتى تاراپىنان قىسىمعا ۇشىراعان بولۋى ىقتيمال" دەگەن بولجام جاسايدى.

وپپوزيتسيانىڭ ۇسىنعان اقپاراتى بويىنشا، ۆەنەسۋەلانىڭ 88 پايىز تۇرعىنى سايلاۋ قورىتىندىسىن مويىنداۋدان باس تارتقان. سونداي-اق سايلاۋ بارىسىندا پوليتسيا مەن حالىق اراسىندا بولعان قاقتىعىستار ناتيجەسىندە، 10 ادام قازا تاپقانى بەلگىلى بولدى.

“The Qazaq Times”