ەۋرووداق پولشاعا ۋلتيماتۋم قويدى

ەۋرووداق پولشاعا سوت رەفورماسىنا قاتىستى قاتاڭ شارالارىن جەڭىلدەتۋگە ءبىر اي ۋاقىت بەردى. مۇنداي ۋلتيماتۋم قويۋعا پولشا بيلىگىنىڭ ەلدەگى سوتتاردى قىزمەتىنەن كۇشتەپ بوساتۋ، ولاردى تاراتۋعا قاتىستى جاساعان ارەكەتتەرى سەبەپ بولعان. 

ەۋروكوميسسيا باسشىسىنىڭ ورىنباسارى فرانس تيممەرمانس بريۋسسەلدە جۋرناليستەرگە بەرگەن سۇحباتىندا: "ەۋرووداق پولشاعا قالىپتاسقان ماسەلەلەرىن شەشۋگە ءبىر اي ۋاقىت بەرەدى. ەگەر وسى ۋاقىت ارالىعىندا جوعارعى سوت قىزمەتكەرلەرىن كۇشتەپ زەينەتكە شىعارۋ نە جۇمىستان بوساتۋ ورىن الاتىن بولسا، وندا ورتاق قۇندىلىقتاردى بۇزعانى ءۇشىن  پولشاعا قارسى 7-باپ قولدانىلىپ، ول كوميسسيا قۇرامىندا داۋىس بەرۋ قۇقىعىنان ايىرىلادى", -دەدى.

پولشانىڭ باسقارۋشى بيلىگى قولعا الىپ وتىرعان رەفورماعا سايكەس، ادىلەت ءمينيسترى جوعارعى سوت قىزمەتكەرلەرىن قىزمەتكە تاعايىنداۋ نە ولاردى جۇمىستان بوساتۋ تۋرالى شەشىمدى جەكە قابىلدايتىن بولادى. ەۋرووداق بۇل زاڭ جوباسىنىڭ قابىلدانۋى، سوت تاۋەلسىزدىگىنە نۇقسان كەلتىرىپ، ەۋرووداق كەلىسىمشارتى ەرەجەلەرىن بۇزادى دەپ وتىر.

ەل ىشىندە ورىن العان جالپىحالىقتىق قارسىلىقتاردان سوڭ، ۇكىمەت جوسپارىنىڭ ەڭ قايشىلىقتى بولىگىنە پولشا پرەزيدەنتى اندجەي دۋدا ۆەتو جاريالاپ، قول قويۋدان باس تارتتى.

پولشانىڭ ەۋروپا ىستەرى بويىنشا سىرتقى ىستەر ءمينيسترىنىڭ ورىنباسارى كونراد شيمانسكي ەۋروكوميسسيانىڭ ايىپتاۋلارىن نەگىزسىز دەپ تاۋىپ، ءار مەملەكەتتىڭ سوت جۇيەسىن ءوزى ۇيىمداستىرۋ قۇقىعىنا يە ەكەندىگىن جەتكىزدى. پولشا ۇكىمەتىنىڭ وكىلى رافال بوچەنەك تە:  "ەۋرووداقتىڭ مەملەكەتتىڭ ىشكى ىستەرىنە ارالاسۋىنا جول بەرمەيمىز!", -دەپ مالىمدەدى.

“The Qazaq Times”