فوتو: SkyscraperCity

قازاقستاندا 80-نەن استام كاسىپورىن جاڭعىرتۋدى تالاپ ەتەدى: كەيبىرەۋلەرىندە تەحنولوگيالىق جەلىلەردى، كەيبىرەۋىندە – جابدىقتاردى الماستىرۋ قاجەت. بۇل تۋرالى  قر اۋىل شارۋاشىلىعى ۆيتسە-ءمينيسترى رۇستەم قۇرمانوۆ ۇكىمەت وتىرىسىنىڭ قورىتىندىسى بويىنشا وتكەن ءباسپاسوز كونفەرەنتسياسىندا مالىمدەدى.

ونىڭ سوزىنشە، اۋىل شارۋاشىلىعى ونىمدەرىن قايتا وڭدەيتىن كاسىپورىندارعا مەملەكەتتىك قولداۋ كورسەتۋ شارالارى قولعا الىنۋ كەرەك.

«كەيبىر كاسىپورىنداردا ءالى كۇنگە دەيىن 60-جىلداردىڭ جابدىقتارى تۇر، ولاردى مىندەتتى تۇردە الماستىرۋ قاجەت، سەبەبى تۇتىنۋشىلاردىڭ ازىق-تۇلىك ونىمدەرى بويىنشا سۇرانىستارى زاماناۋي تەحنولوگيالىق جابدىقتاردا جاسالۋى قاجەت»، - دەدى ر. قۇرمانوۆ.

ۆيتسە-ءمينيستردىڭ سوزىنشە، قايتا وڭدەۋ كاسىپورىندارىن جاڭعىرتۋ اينالىمدىق جانە نەگىزگى قاراجاتتار بويىنشا سىياقى مولشەرلەمەسىن سۋبسيديالاۋ ارقىلى قايتا وڭدەۋ كارتاسىنىڭ جوبالارىن قارجىلاندىرۋعا تارتۋدى كوزدەيتىن بانكتەردىڭ رەسۋرستارى ەسەبىنەن جۇرگىزىلەتىن بولادى.

بارلىعى جاڭعىرتۋعا 2021 جىلعا دەيىن 226,9 ملرد تەڭگە كولەمىندەگى نەسيەلىك قاراجاتتاردى باعىتتاۋ كوزدەلىپ وتىر. ول ءۇشىن مەملەكەتتىك بيۋدجەتتەن سىياقى مولشەرلەمەسىن سۋبسيديالاۋعا 24 ملرد تەڭگە بولىنەتىن بولادى. اينالىمدىق قاراجات بويىنشا مولشەرلەمەلەردى سۋبسيديالاۋ 4%-دى قۇرايدى.

دەگەنمەن ايتا كەتەيىك، سەنات دەپۋتاتى  سەرىك ءبىلالوۆ اۋىل شارۋاشىلىعىنا بولىنەتىن سۋبسيدياعا قاتىستى «اگرارلىق سەكتورداعى ءونىم كوبىنە شيكىزات كۇيىندە تاراتىلۋدا. ويتكەنى دايىن ءونىم باسەكەلەستىككە توتەپ بەرە المايدى. ءبىز نەگىزىنەن شيكىزات ساتامىز، ەسەسىنە وڭدەلگەن تاۋارلاردى كوبىرەك ساتىپ الىپ جاتىرمىز. ياعني سۋبسيديالاۋ سالاسىنان تولىققاندى ناتيجە جوق. سۋبسيديالاۋ ونىمدىلىكتى جوعارىلاتۋعا جانە وندىرىلەتىن ءونىمنىڭ ساپاسىنا ەش اسەرەتە المايدى» دەگەن ەدى.

“The Qazaq Times”