ءۇندىستان قاجىلىققا باراتىن مۇسىلماندارعا سۋبسيديا بەرۋدى توقتاتادى

ءۇندىستان ءوز ازاماتتارىنىڭ مەككە قالاسىنا قاجىلىق ساپارعا بارۋى ءۇشىن بەرىلەتىن مەملەكەتتىك سۋبسيديانى توقتاتادى. ءۇندىستاننىڭ ازشىلىق توپتاردىڭ ماسەلەلەرى جونىندەگى ءمينيسترى مۇحتار ابباس ناحۆي قاجىلىق ساپارىن قولداۋعا جۇمسالىپ كەلگەن قارجى ەندى ازشىلىق توپتاردان شىققان ايەلدەردىڭ ءبىلىم الۋىن قامتاماسىز ەتۋگە جۇمسالادى. بۇل تۋرالى ءال-جازيرا اقپاراتتىق اگەنتتىگى جازدى. 

بۇل شەشىم 2012 جىلى ءۇندىستاننىڭ جوعارعى سوتىنىڭ ەل ۇكىمەتىنە مۇسىلماندارعا قاجىلىق ساپار ءۇشىن بەرىلەتىن سۋبسيديالاردى جىل سايىن قىسقارتىپ، 2022 جىلعا قاراي مۇلدە توقتاتۋ تۋرالى تاپسىرماسىنا نەگىزدەلگەن. وسى جارلىققا سايكەس، مەككەگە ساپارى ءۇشىن 2013 جىلى 100 ملن $ بولىنسە، 2016 جىلى بۇل كورسەتكىش 75 ملن $ دەيىن قىسقارعان.

ءۇندىستان كەدەي مۇسىلمانداردىڭ قاجىلىق مىندەتىن اتقارۋى ءۇشىن 1954 جىلدان بەرى مەملەكەت تاراپىنان قارجىلىق قولداۋ كورسەتىپ كەلەدى. بۇل باعدارلاما اياسىندا مۇسىلماندارعا اۋە بيلەتتەرىن الۋعا  جەڭىلدىكتەر بەرىلەدى. ساراپشى فايزان مۇستافانىڭ ايتۋىنشا، سۋبسيديالاردىڭ نەگىزگى بولىگى Air India كومپانياسى كىرىسىنىڭ ايتارلىقتاي بولىگىن قۇراپ كەلگەن.

رەسمي دەرەكتەرگە سايكەس، بيىل ءۇندىستاننان 175 مىڭ مۇسىلمان قاجىلىققا بارادى. سۋبسيديالاۋ باعدارلاماسى كەدەي مۇسىلمانداردىڭ قاجىلىققا بارۋىنا مۇمكىندىك بەرۋ ماقساتىندا اشىلعان. دەگەنمەن سوڭعى كەزدەرى ءۇندىستاننىڭ بيلىكتەگى ۇلتتىق پارتياسى سۋبسيدياعا قارسىلىق ءبىلدىرىپ كەلگەن ەدى.

“The Qazaq Times”