پولشانىڭ بىرنەشە ءىرى قالالارىندا جوعارعى سوتتىڭ قۇزىرەتتىلىگىن شەكتەيتىن زاڭ جوباسىنىڭ قابىلدانۋىنا قارسى ەرەۋىلدەر ءجۇرىپ جاتىر. بۇل تۋرالى New York Times گازەتى مەن  Euronews اقپاراتتىق اگەنتتىگى جازادى.

زاڭ جوباسىنا ەنگىزىلەتىن وزگەرىستەرگە سايكەس، جوعارعى سوت قىزمەتكەرلەرىن تاڭداۋ مەملەكەتتىك بيلىكتىڭ قولىنا بەرىلمەك. وسىعان دەيىن كانديداتتار تاۋەلسىز كوميسسيانىڭ شەشىمىمەن سايلانىپ كەلگەن. ءبىر عانا ۆارشاۆا قالاسىنىڭ وزىندە قولدارىنا شىراقتار مەن پولشانىڭ جانە ەۋرووداقتىڭ تۋىن ۇستاعان 50 مىڭعا جۋىق ادام بەيبىت شەرۋگە شىقتى. ەل استاناسىنان بولەك، نارازىلىق شەرۋلەرى پولشانىڭ ليۋبلين، كراكوۆ، ۆروتسلاۆ، پوزنان، كاتوۆيتسا، ەلبلونگ، ستارگارد قالالارىندا ءوتىپ جاتىر.

كوتەرىلىسكە شىعۋشىلار: "بارلىق ديكتاتۋرا وسىلاي باستالادى. بيلىك اۋەلى، ءباسپاسوزدى قاداعالاۋدى قولعا الادى، كەيىننەن سوت بيلىگىن شەكتەيدى. بۇگىن ءبىز قارسىلىق تانىتپاساق، بۇل ارى قاراي دا  جالعاسا بەرەدى", -دەپ ۇرانداتتى.

جاڭا وزگەرىستەر دەموكراتيالىق پرينتسيپتەرگە قايشى كەلەتىندىگىن ەۋرووداق تا قولداپ، پولشانىڭ پرەزيدەنتى اندجەي جەپلينسكي اتالعان زاڭ جوباسىنا قول قويسا، مەملەكەتكە قارسى سانكتسيالار ەنگىزەتىندىگىن حابارلاعان بولاتىن. ەگەر ەل بيلىگى ءوز  دەگەنىنەن قايتپاسا، پولشا ەۋروكوميسسياداعى داۋىس بەرۋ قۇقىعىنان ايىرىلۋى مۇمكىن.

پولشانىڭ ناتو-داعى ەڭ ۇلكەن ارىپتەسى اقش-تىڭ اكىمشىلىگى جولداعان رەسمي مالىمدەمەدە: "كەز-كەلگەن وزگەرىستەر مەن جاڭاشىلدىقتار پولشانىڭ كونستيتۋتسياسى مەن حالىقارالىق شارتتارعا قارسى كەلمەۋى جانە سوت بيلىگىنىڭ تاۋەلسىزدىگىن قامتاماسىز ەتۋى كەرەك" دەلىنگەن.

“The Qazaq Times”