فوتو: Kapital.kz

كەشە قر دەنساۋلىق ساقتاۋ ءمينيسترى ەلجان ءبىرتانوۆ پەن "تالاپ" قولدانبالى زەرتتەۋلەر ورتالىعىنىڭ ديرەكتورى، ەكونوميست راقىم وشاقباەۆ "حابار" تەلەارناسىندا مىندەتتى الەۋمەتتىك مەديتسينالىق ساقتاندىرۋعا قاتىستى تەلەدەبات ۇيىمداستىردى. 

راقىم وشاقباەۆتىڭ سوزىنشە، ءمامس سالىقتىڭ جاڭا ءتۇرى عانا.

ء"سىز اي سايىن مىندەتتى الەۋمەتتىك مەديتسينالىق ساقتاندىرۋ دەيتىن قورعا ميليليونداعان قازاقستاندىقتان 1,5 مىڭ تەڭگەدەن جيناعىڭىز كەلەدى. مۇنى ساقتاندىرۋ قورى دەپ اتاپ وتىرسىز، ال مەن ولاي دەمەس ەدىم... بۇل جاي عانا تولەم، بۇل سالىق", - دەدى ەكونوميست.

سونداي-اق، ول ءمامس اياسىندا قاراجاتتىڭ باقىلانۋىنا قاتىستى ماسەلەلەردى ايتا كەلىپ، مەدساقتاندىرۋ قورى بجزق-نىڭ ەكىنشى ءبىر ءتۇرى، بيۋدجەتتەن تىس قۇرىلعان كەزەكتى قور ەكەنىن اتاپ ءوتتى.

ال مينيستر ەلجان ءبىرتانوۆ ءوز كەزەگىندە ءمامس ەڭ الدىمەن قازاقستاننىڭ دەنساۋلىق ساقتاۋ جۇيەسىندەگى قارجى تۇراقتىلىعىن قامتاماسىز ەتۋ ماقساتىندا قۇرىلعانىن ايتتى.

سكرينشوت youtube.com

"بىزدە حالىق قارتايىپ بارادى، بالالاردىڭ ۇلەسى كوبەيىپ كەلەدى. اۋرۋ تۇرلەرى دە وزگەرگەن، سوزىلمالى اۋرۋلاردىڭ كورسەتكىشى جوعارى. سوندىقتان ءبىز وسىعان قاراجاتتى قايدان الاتىنىمىزدى ويلانۋىمىز كەرەك. ءبىرىنشى كەزەكتە ءمامس دەنساۋلىق ساقتاۋ جۇيەسىندەگى قارجى تۇراقتىلىعىن قامتاماسىز ەتۋگە باعىتتالعان", - دەدى ەلجان ءبىرتانوۆ.

ءمينيستردىڭ ايتۋىنشا، قازاقستاندا دەنساۋلىق ساقتاۋ جۇيەسىنە جۇمسالعان قارجى جالپى ىشكى ءونىمنىڭ 1,9 پايىزىن قۇرايدى. وسى سەبەپتى قارجى تابۋدىڭ جاڭا كوزى قاجەت ءارى حالىقتىڭ ورتاق جاۋاپكەرشىلىگى كەرەك.

ء"وزىمىزدىڭ دەنساۋلىعىمىز بەن بولاشاعىمىز ءۇشىن وسى قاراجاتتى جيناۋ كەزىندە حالىق اراسىندا ورتاق جاۋاپكەرشىلىك بولۋ كەرەك جانە مەن مۇنى قالىپتى تاجىريبە دەپ ەسەپتەيمىن", - دەدى ەلجان ءبىرتانوۆ.

ايتا كەتەيىك، جۇمىس بەرۋشىلەر ءمامس جۇيەسى بويىنشا جارنا تولەۋدى وسى جىلداڭ شىلدە ايىندا باستاپ كەتتى. ال جەكە قىزمەتكەرلەر 2019 جىلدىڭ 1 قاڭتارىنان باستاپ جارنا تولەي باستايدى.

“The Qazaq Times”