فوتو: Forbes

قازاقستاننىڭ كونسۋلدارىنا تۇرعىن ءۇي قۇرىلىس جيناق بانكىن ساتىپ الاتىن ينۆەستور ىزدەۋ تۋرالى ۇسىنىس جاسالدى. بۇل تۋرالى "بايتەرەك" حولدينگىنىڭ باسقارما مۇشەسى - باسقارما ديرەكتورى اينۇر قۋاتوۆا مالىمدەدى. 

ونىڭ سوزىنشە، "بايتەرەك" قازىرگى كەزدە ەنشىلەسى تۇرعىن ءۇي قۇرىلىس جيناق بانكىنە ستراتيەگيالىق سەرىكتەس ىزدەپ جاتىر.

«ەنشىلەس ۇيىمىمىز تۇرعىن ءۇي قۇرىلىس جيناق بانكىنە ستراتەگيالىق ارىپتەستى تارتۋ جۇمىسى باستالدى. بۇل بانك ەلىمىزدەگى نەمىس تاجىريبەسى بويىنشا 2003 جىلدان بەرى تۇرعىن ءۇي جيناق جۇيەسىن جۇزەگە اسىرىپ كەلەدى. سوندىقتان قۇرمەتتى كونسۋلداردان بانككە ستراتەگيالىق ارىپتەس ىزدەستىرۋ جۇمىسىنا قوسىلۋدى ۇسىنامىز. بۇدان اكتسيونەرلىك كاپيتالدى تارتىپ قانا قويماي، يپوتەكالىق كرەديت نارىعىن دا دامىتۋعا بولادى»، — دەيدى قۋاتوۆا.

ايتا كەتەيىك، تۇقجب 2016 جىلى جەكەشەلەندىرۋگە قويىلعان. بانك ءۇشىن تۇرعىن ءۇي جيناعى نارىعىندا تاجىريبەسى بار ارنايى ساتىپ الۋشىلاردى ىزدەۋ جوسپارلانعان. سونداي-اق، بانك جەتەكشىلەرى تۇقجب-عا جاڭا ينۆەستوردىڭ كەلۋى يپوتەكا بەرۋ شارتتارىنا ەش اسەر ەتپەيتىنىن ايتقان.

ال وسى جىلدىڭ مامىر ايىندا ەسەپ كوميتەتى "سامۇرىق-قازىنا" قورىنىڭ قۇرامىنداعى ءۇش كومپانياعا بيۋدجەتتەن قاراجات بولىنگەنمەن، 400 مىڭ شارشى مەتردەن اسا تۇرعىن ءۇي پايدالانۋعا بەرىلمەگەنىن مالىمدەگەن ەدى. ولاردىڭ اقپاراتىنشا، تۇرعىن ءۇي قۇرىلىس جيناق بانكى 2011-2012 جىلدارى "قولجەتىمدى باسپانا-2020" باعدارلاماسىنىڭ قاتىسۋشىلارىن كرەديتتەۋ جانە جارعىلىق كاپيتالىن تولتىرۋ بويىنشا بولىنگەن 21 ملرد تەڭگەنى يگەرمەگەن. 161 مىڭ شارشى مەتردى قۇرايتىن تۇرعىن ءۇي پايدالانۋعا بەرىلمەگەن.

 “The Qazaq Times”