10 اقپان، 2023 جىل. جەتىسۋ وبلىسى، تالدىقورعان قالاسى. قالالىق سوتتىڭ 39 رەتكى وتىرىسىندا «ازاپتاۋشى» پوليتسەيلەردىڭ سوڭعى ءسوزى تىڭدالدى.

سوتتالۋشى ايدىن كەنجەباەۆ سوڭعى سوزىندە: بارلىق جابىرلەنۋشىلەردەن كەشىرىم سۇرايمىن. بىزگە ءادىل شەشىم قابىلدايدى دەپ ۇمىتتەنەمىز. شارتتى جازا قولدانادى دەگەن ۇمىتتەنەمىز. ءوزىم وتباسىندا جالعىز اسىراۋشى ەكەنىمدى ايتقىم كەلەدى جانە كامەلەتكە تولماعان بالام بار ەكەنىن نازارىڭىزعا الۋىڭىزدى سۇرايمىن. وسى ىستەگەن ىستەردىڭ بارلىعىن قارا باسىمدى ويلاپ ىستەگەم جوقپىن. ارينە وكىنىشتى بۇلاي بولعانى، ۇكىمەت جاعىنان دا بىزگە ادىلسىزدىك باسىم بولىپ تۇر، ءادىل شەشىم قابىلدايسىز دەپ سەنەمىن دەدى- دەدى.

كەلەسى سوتتالۋشىلار: الماس بوقانوۆ، نۇرتازا جانباقىت، سارپارمۇرات توقتاش، ەرمەك جۇماشەۆتەر قاڭتار وقيعاسىنا بايلانىستى جابىرلەنۋشىلەردەن كەشىرىم سۇرايتىنىن، شىنىمەن وكىنەتىندەرىن، سوتتان شارتتى تۇردە سوتتاۋدى سۇرايتىندارىن ايتىستى.

قاندى قاڭتار قىرعىنىندا ۇستالعانداردى ازاپتادى دەپ ايىپتالىپ قاماۋدا وتىرعان 5 پوليتسەيگە قاتىستى سوت 2022 جىلدىڭ  9 قىركۇيەگىندە باستالعان. ىستە 23 جابىرلەنۋشى بار. دەنەلەرىنە ۇتىك باسىلىپ، ءتىسى جۇلىنىپ ءتۇرلى ازاپ كورگەن جابىرلەنۋشىلەر اۋەلدە ءادىل سوت ۇكىمىن تالاپ ەتىپ بارلىعىن سوتتاۋ تۋرالى تالاپ قويعان. الايدا سوڭىندا بارلىعى بىردەي وزدەرىن ازاپتاعاندارعا كەشىرىم بەرىپ، سۋديا دۇيسەنبەكوۆتان سوتتالۋشىلاردى باس بوستاندىعىنان ايىرمايتىن جازا قولدانۋدى تالاپ ەتتى.

سوتتالۋشىلار مەن ولاردىڭ ادۆوكاتتارى جابىرلەنۋشىلەردەن دە كەشىرىم حات جيناپ ايىپتاۋشى پروكۋروردان قىلمىستىس كودەكستىڭ 63 بابىمەن شاتتى تۇردە سوتتاۋعا ءوتىنىش بەرگەن.

جەتىسۋ وبلىستىق پروكۋراتۋراسى ايىپتالۋشىلاردىڭ بۇل ۇسىنىستارىن قابىلداماي ءىستى سوتتىڭ قاراۋىنا قالتىرعان.

«ازاپتاۋشىلاردىڭ» سوڭعى ءسوزىن تىڭداعان سۋديا بەكمۇرات دۇيسەنبەكوۆ كەڭەسۋ زالىنا كەتتى. سوت ۇكىمى 16:00 دە وقىلادى دەپ كۇتىلۋدە.

The Qazaq Times