بۇگىن 3 اقپاندا جەتىسۋى وبلىسى، تالدىقورعانداعى قالالىق سوتتا قاندى قاڭتار قىرعىنى كەزىندە ۇستالعاندارعا ۇتىك باسىپ، تىرناقتارىنا ينە جۇگىرتىپ تاعى دا باسقا ءتۇرلى ازاپتاۋلارمەن كىنالارىن مويىنداتپاق بولعان «ازاپتاۋشى» بەس پوليتسەيدىڭ ۇستىنەن قوزعالعان سوتتا ءجارىسسوز باستالدى. مەملەكەتتىك ايىپتاۋشى اجار نۇرلانوۆا سۋديا بەكمۇرات دۇيسەنبەكوۆتان كۇدىكتىلەردى كىنالى دەپ تانىپ، 3 جىلدان 5 جىلعا دەيىن باس بوستاندىعىنان ايىرۋ جازاسىن بەرۋدى سۇرادى.

پروكۋرور ايدىن كەنجەباەۆتى كىنالى دەپ تانىپ، 5 جىلعا باس بوستاندىعىنان ايىرۋدى سۇرادى.

– كەنجەباەۆ ايدىن ەركىنۇلىن قر قك 146 بابىنىڭ 2 بولىگىنىڭ 1,2,3,4 تارماقتارى بويىنشا كىنالى دەپ تانىپ، وعان 3 جىل مەرزىمىندە قۇقىق قورعاۋ جۇيەسى مەن مەملەكەتتىك قىزمەت لاۋازىمدارىن اتقارۋ قۇقىعىنان ايىرا وتىرىپ، 5 جىل باس بوستاندىعىنان ايىرۋ جازاسى تاعايىندالسىن، – دەدى.

مەملەكەتتىك ايىپتاۋشى كۇدىكتىلەر ساپارمۇرات توقتاش پەن جانباقىت نۇرتازانى كىنالى دەپ تانىپ، 4 جىلعا، الماس بوقانوۆ پەن ەرمەك جۇماشەۆتى 3 جىلعا باس بوستاندىعىنان ايىرۋدى سۇرادى. سنىمەن قاتار نۇرلانوۆا سوتتالۋشىلاردىڭ بارلىعىن لاۋازىمدى شەندەرىنەن، 3 جىل مەرزىمىندە مەملەكەتتىك جانە قۇقىق قورعاۋ جۇيەسىندە قىزمەت اتقارۋ قۇقىعىنان ايىرۋدى، جازانى قاۋىپسىزدىگى ورتاشا مەكەمەدە وتەۋ جازاسىن تاعايىنداۋدى سۇرادى.

ەسكە سالا كەتسەك: "ازاپتاۋشى" 5-ىنە تاعىلىپ وتىرعان ايىپ قىلىمىستىق كودەكىستىڭ 146ي ازاپتاۋلار بابىنداعى بولىكتەرىندە "1) ادامدار توبى نەمەسە الدىن الا ءسوز بايلاسۋ ارقىلى ادامدار توبى جاساعان; 2) بiرنەشە رەت; 3) دەنساۋلىققا اۋىرلىعى ورتاشا زيان كەلتiرە وتىرىپ; 4) كiنالi ادامعا جۇكتiلىك جاعدايدا ەكەنى كورiنەۋ بەلگىلى ايەلگە نەمەسە كامەلەتكە تولماعان ادامعا قاتىستى جاسالعان ءدال سول ءىس-ارەكەتكە دەپ كورسەتىلسە، تاعايىندالاتىن جازا  – بەلگiلi بiر لاۋازىمداردى اتقارۋ نەمەسە بەلگiلi بiر قىزمەتپەن اينالىسۋ قۇقىعىنان ءۇش جىلعا دەيiنگi مەرزiمگە ايىرا وتىرىپ، ءۇش جىلدان جەتi جىلعا دەيiنگi مەرزiمگە باس بوستاندىعىنان ايىرۋعا جازالانادى." -دەلىنگەن.

ايىپتالۋشىلاردىڭ ادۆوكاتتارى پروكۋروردىڭ ءوتىنىش-تالابىنا قارسىلىق بىلدىرمەدى. تەك جارىس سوزگە دايىن ەمەس ەكەندەرىن ايتىپ ءسوتتى كەيىنگە قالتىرۋدى سۇرادى.

سۋديا دۇيسەنبەكوۆ ايىپتالۋشى جاقتىڭ ءوتىنىشىن قاناعاتتاندىرىپ سوتتى الداعى 6 اقپانعا قالتىردى.

جابىرلەنۋشى تاراپتان ەلنۇر تۇراحمەتوۆ پەن ارمان تەڭىزباەۆ سۋديادان سوتتالۋشىلارعا شارتتى جازا بەرۋىن سۇراپ، مۆد وزدەرىنە دە شارتتى جازا بەرگەنىن العا تارتتى.

– بەس سوتتالۋشىعا شارتتى جازا بەرۋىڭىزدى سۇرايمىن. ويتكەنى وسىنداي جاعداي بولعان كەزدە ءىىم بىزگە دە كەشىرىم بەردى. سوندىقتان بۇلارعا دا كەشىرىم بەرۋلەرىڭىزدى تالاپ ەتەمىن. ءبىز دە كەشىرىم بەرىپ وتىرمىز. مەنەن باسقا جابىرلەنۋشىلەردىڭ بارلىعى وسىلاي سۇرايدى دەگەن ۇمىتتەمىن. بۇل كىسىلەر ءبىزدىڭ قويعان تالاپتارىمىزدىڭ بارلىعىن ورىنداپ، كومەكتەستى، – دەگەندى ايتتى.

36 رەتكى ءوتىپ جاتقان سوت وتىرسىندا 23 جابىرلەنۋشى، 5 ايىپتالۋشى بار.

The Qazaq Times