فوتو: akorda.kz

شاعىن جانە ورتا بيزنەس استانانىڭ جالپى تابىسىنىڭ 65 پايىزىن قۇرايدى. بۇل تۋرالى پرەزيدەنت نۇرسۇلتان نازارباەۆ استانا كۇنىنە ارنالعان سالتاناتتى ءىس-شارا كەزىندە مالىمدەدى.

نۇرسۇلتان نازارباەۆ استانانىڭ بۇگىنگى دامۋ ىرعاعى بۇكىل ەلىمىزدىڭ جاڭارۋىنا سەرپىن بەرەتىنىن ايتتى.

– ءبىز ەكونوميكادا، ساياساتتا جانە مادەنيەتتە اۋقىمدى جاڭعىرۋدى ىسكە اسىرىپ كەلەمىز. سول جۇمىستىڭ ناتيجەسى ەلىمىزدى دامىتۋعا ارنالعان. دامۋىمىزدىڭ باسىندا ءاردايىم استانا تۇرادى. ءبىز مۇندا ءتۇرلى ماسەلەنى، سونىڭ ىشىندە الەمنىڭ ءار تۇكپىرىندە بەيبىتشىلىك ورناتۋ ماسەلەسىن دە شەشىپ كەلەمىز. ءبىزدىڭ بەيبىت، تاتۋ كورشىلىك جانە ينۆەستيتسيا تارتۋ جونىندەگى ساياساتىمىز ءاربىر قازاقستان ازاماتى ءۇشىن قولايلى جاعداي جاساۋعا باعىتتالعان، – دەدى نۇرسۇلتان نازارباەۆ.

سونداي-اق، پرەزيدەنت «ەكسپو-2017» كورمەسىنىڭ ارقاسىندا قازاقستان حالىقارالىق قوعامداستىق نازارىن وزىنە اۋدارتىپ وتىرعانىن اتاپ ءوتتى.

"قوناقتارىمىز استاناعا تامسانا قارايدى. ءبىز – عاسىرلار توعىسىندا جاڭا مەگاپوليس سالعان بىردەن-ءبىر مەملەكەتپىز. بۇگىندە استانا جىلىنا ەل بيۋدجەتىنە تريلليون تەڭگە قۇيىپ كەلەدى. بۇل ورايدا، بارلىق كىرىستىڭ 65 پايىزى شاعىن جانە ورتا بيزنەستەن ءتۇسىپ وتىر. ءبىز استانانىڭ قالىپتاسۋىنىڭ كۋاسى بولدىق", - دەدى پرەزيدەنت.

 “The Qazaq Times”