امەريكا مەملەكەتتەرى ۇيىمىنىڭ باس حاتشىسى ۆەنەسۋەلانىڭ «تاۋەلسىزدىگى» ءۇشىن قىزمەتىنەن باس تارتتى

امەريكا مەملەكەتتەرى ۇيىمىنىڭ باس حاتشىسى لۋيس الماگرو ۆەنەسۋەلادا دەموكراتيالىق وزگەرىستەر ورىن الۋى ءۇشىن ءوز قىزمەتىنەن كەتەتىنىن مالىمدەدى.  

ول وسىلاي ۆەنەسۋەلا پرەزيدەنتى نيكولاس مادۋرونىڭ: «ەگەر لۋيس الماگرو ءوز قىزمەتىنەن باس تارتسا عانا، ۆەنەسۋەلا امەريكا مەملەكەتتەرى ۇيىمىنا قايتا كىرۋ ماسەلەسىن قاراستىرادى»، -دەگەن مالىمدەمەسىنە جاۋاپ بەردى.

اتاپ ءوتۋ كەرەك، ۆەنەسۋەلا ۇكىمەتى اتالعان ۇيىمنان شىعاتىنىن ايتىپ، وزگە وداقتاس مەملەكەتتەردىڭ ەل ىشىندەگى داعدارىسقا بايلانىستى قانداي دا ءبىر ارەكەت جاساۋىنا تىيىم سالاتىندىعىن جەتكىزگەن ەدى. اعىمداعى جىلدىڭ ءساۋىر ايىنان باستاپ، ۆەنەسۋەلادا ەل پرەزيدەنتى نيكولاس مادۋرونىڭ ساياساتىنا قارسى جالپىحالىقتىق تولقۋلار بولىپ جاتىر.

لۋيس الماگرو ءوزىنىڭ تۆيتتەر پاراقشاسىندا : «مەن ءوز قىزمەتىمدى ۆەنەسۋەلاداعى تاۋەلسىزدىكتىڭ ورنىنا ۇسىنامىن. ءبىز ۆەنەسۋەلادا تولىق تاۋەلسىزدىك ورناتپايىنشا، ونداعى قيىندىقتاردى ەڭسەرۋگە ارالاسۋدان باس تارتپايمىز. بۇل داعدارىسقا كوز جۇمىپ قاراپ وتىرا المايمىز»، -دەپ جازدى. باس حاتشى سونداي-اق، ۆەنەسۋەلاداعى ساياسي تۇتقىنداردى بوساتۋ، ەلگە ازىق-تۇلىك پەن ءدارى-دارمەك جەتكىزۋ ءۇشىن گۋمانيتارلىق كومەك شارالارىن ۇيىمداستىرۋ، پارلامەنتكە ونىڭ قۇزىرەتتىلىگىن قايتارۋ مەن تاۋەلسىز سوت بيلىگىن ورناتۋ – ءبىرىنشى كەزەكتەگى ماسەلەلەر ەكەندىگىن جەتكىزدى.

“The Qazaq Times”